TURA: Adita salrangna skang, South Garo Hills a·jani Krishi Vigyan Kendra (KVK)-ni gita FSPF-ni ning·o NABARD baksa nangrime Farmers-Scientist Interation Program-ko South Garo Hills a·jao ong·atangaha aro ia program-ko ong·atanio jile kae cha·enggipa manderangna janggi tangani cholrangko on·na gita wak bi·sarangko suale on·angjolaha.
Ia program-ko ong·atanio SGH KVK-ni Senior Scientist aro Head, Dr Athokpam Haribhushan, ia project-ni gimin talate on·angengon, sorkarini ra·gatgipa dingtang dingtang scheme aro program-rangchi songni nokni manderangni janggi tangani gadangko nambatatna gita man·enga ine parakataha.
Ia program-ko ong·atanio South Garo Hills NABARD-ni DDM Khelchandra Chongtham, mongsonggipa sokgipa ong·e, tom·anio bak ra·giparangna aganprakangengon, songo noko game ge·e cha·enggipa manderangni namgnina iandake jilla kaani kamrangko ra·gate on·engani gimin South Garo Hills a·jani KVK-ko mittelpilangenba, iandakgipa program-rangko ong·atna mikkangchiba uamang pilak nanga dakchakanirangko on·angkugen ine ku·rachakaniko on·angaha.
Ia program-ko ong·atanio South Garo Hills a·jani Chokpot Block-ni ning·o donggipa Asugre, Dagal Gopgre aro Daji Badima songni sak 33 manderangna gimik mang 33 wak bi·sarangko suale on·angaha.
Ia program-ko ong·atanio dongpae jinmana aganprakanggipa gipin manderangara, SGH KVK-ni SMS (Livestock Production) Dr Rupam Bhattacharya, SGH KVK-ni Dr Karam Amarjit Singh aro gipinrang ong·a.
