TURA: Re·anggipa Budbar salo, Naguapara-ni NPP MDC Dhormonath Sangma aro dingtang dingtang political dolni dilgiparangko man·chape sak 700-mangni manderang, Bharatiya Janata Party (BJP)-o napgopangaha.
BJP-o napanggipa manderangoni mitamrangara, NPP Ampati Block-ni chairman Drozil Sangma, Indian National Congress (INC)-ni block secretary Dulal Sarkar, Mendipathar NPP-ni dilgipa Pulin Hato aro gipinrang ong·achim.
Ia manderangko, BJP-ni national vice president aro Meghalaya I/c M Chuba Ao, BJP-ni national secretary Rituraj Sinha, BJP-ni state president Ernest Mawrie, BJP Assam-ni media convenor Rupam Goswami aro gipin dilgiparang, BJP-ona rimchaksoaha.
BJP-ona re·bagipa manderangko rimchaksona tom·aniko ong·atanio BJP-ni national secretary Rituraj Sinha, jinmana aganprakengon, ia manderangna an·tangtangni constituency-o manderangna dangdike on·na gita cholrangko on·gen ine ku·rachakaniko on·angaha.
Ia tom·anio BJP-ni national vice president M Chuba Ao-ba jinmana aganprakengon, a·gilsako dal·batsranggipa political dol ong·e BJP, manderangna kakketo dangdike on·enga ine parakangaha.
Ia tom·anio Meghalaya BJP-ni state president Ernest Mawrie-ba jinmana aganprakengon, ia sal somoirango pilak biaprangon manderang BJP-ona re·batokengani gimin re·baenggipa bilsio BJP dolan sorkariko rikgen ine an·tangni ka·dongchakenganiko parakangaha.
