SHILLONG: Shillong songjinmani Mawkasiang-o rikgipa Shillong International Centre for Performing Arts & Culture (SICPAC)-ko Sombar salo, a·dokni Chief Minister Conrad K Sangma, kulie on·angaha aro ia centre-ko kulie on·anganio a·dokni Deputy Chief Minister Prestone Tynsong, Arts & Culture Minister Sanbor Shullai, PHE Minister Renikton Lyngdoh Tongkhar, Chief Secretary DP Wahlang aro dingtang dingtang sorkari officer-rangba bakko ra·angaha.
Ia SICPAC-ko rikna gita bilsisnina skangan 2015 bilsio, a·dokni gitcham Chief Minister Mukul Sangma, pangchakaniko songe on·angahachim aro da·alo ia centre-ko a·dokni Chief Minister ong·enggipa Conrad Sangma, kulie on·angskaaha.
Ia SICPAC-ko rikani da·o matchotahani gimin, dingtang dingtang program-rang jekai, Music, Theatre, Dance, Film Festival aro uandakgipa ma·manti program-rangko ia biapo ong·atna gita jakkalanggnok.
Ia SICPAC-ko kulie on·angani somoio a·dokni Chief Minister, jinmana aganprakangengon, ia gital centre-ko a·dokni chadamberangna pakwate on·angenba, ia SICPAC-ko matchote rikna gita tangka paisarangko dakchake on·ahani gimin ma·mong sorkariko mittelpilangaha.
Ia centre-ko nokdonggana gita dingtangmancha program-ko ong·atahani gimin a·dokni Arts & Culture department-ko mittelpilangengon, “Ia centre-ko chu·sokgipa ong·atna gita tangka paisarangko dakchake on·ahani gimin ia cholko ra·e anga dingtangmancha India sorkariko aro mongsongbate DoNER Ministry, NEC aro Tribal Affairs Ministry-ko mittelpilna ska,” ine Sangma aganaha.
Bi·sarangni salo dingtangmancha a·dokni bi·sa sakantinan an·tangni namgipa skaniko parakatengon, ia auditorium aro chu·gimik centre-ko chadamberangna aro mikkangchini manderangna pakwate on·enga ine Chief Minister parakataha.
Department-ni official-rang, contractor-rang aro pilak dolrangan rakbee kamrangko ka·ahani a·selsa ia state-of-art auditorium aro centre of performance-ko da·alo matchotatna man·aha ineba ua aganaha.
“Ia bilsio an·ching a·dokni bilsi 50 gapaniko maniengani gimin ia nitobegipa auditorium-ko kulie on·na gita ian nambegipa somoi ong·aha,” ineba ua aganaha.
Ia centre-ko kulie on·angani somoio Magnificent 7, Shillong Chamber Choir, Summer Salt aro uandakgipa dingtang dingtang dolrangni git ring·ani aro dakmesokanirangkoba nikangna gita man·aha.
Ia gital rikgipa centre-o sak 574 manderang asongna biap donggipa black box theatre-ba donga aro ia theatre-ko jawilwat mesokna aro dakmesokanirangkoba mesokna gita jakkalangna man·gen.
Ia SICPAC-o sak 15,000 manderangko sokachakna man·gipa amphitheatre-ba donga aro sak 302 manderangko asongatna man·gipa chongipa theatre-ba donga, jeon dakmesokanirang baksana chrokanirangko ong·atskana man·gen.
Ia SICPAC-o Tribal museum, VIP lounge aro VIP banquet hall-rangba donga.