NONGPOH: Sukrobar pringo Ri Bhoi a·jani police-rang, Shillong-oni Manipur a·dokona re·angenggipa MN-01AA 0484 bus garioniko gong kror 14-mangni heroin samrangko rim·na man·aha ine kobor on·aha.
Police-rangni u·iatani gitade, bus gario pekatgipa samrangko badingsrukatenga ine koborko man·soani ja·man police-rang, ia Bus gariko Sukrobar pringni 5:00 bajimango Saiden songo donggipa National Highway (NH-6) ramao rim·soaha aro ia bus garioniko am·sandion, ge 158 sabon baksorango chipe ra·baenggipa heroin samrangko man·aha.
Ia heroin samrangko bus garini janggilo donggipa cabin-o donue ra·angengachim.
Ia bus gariara, Manipur a·dokni chatro chatrirangko study tour-na Shillong-ona salbagipa garisa ong·achim aro uandaken ja·mano police-rang, chatro chatrirangna bus gari bolgipinko on·atskana nangaha ineba u·iataha.
Ia bus garini driver aro una dakchakgipa mande sakgni, chong·motan Sadam Hussain, Iqbal Hussain aro Rashi Judin-ko iani bidingo police-rang rim·aha.
