TURA: All India Trinamool Congress (AITC)-ni national general secretary aro MP Abhishek Banerjee-ni salgnina Garo Hills-ona re·baanio Sukrobar salo dingtangmancha TMC-ni bilko mesokna gita Tura-o re·jomaniko ong·atangaha aro New Tura kal·chakramo jinma tom·bimonganikoba ong·atangaha.
Ia re·jomani aro tom·bimonganiko ong·atanio Garo Hills gimikonin TMC-na kamko ka·enggipa bang·bea manderang re·bae bakko ra·angtokaha aro Tura jillao salgimikan garirangni apchangket ong·aniko nikna gita man·aha.
TMC-ni tom·bimonganiko ong·atanio TMC-ni Meghalaya in-charge Ranjan Bhunia, national spokesperson Saket Gokhale, Meghalaya TMC-ni state president Charles Pyngrope, Opposition TMC-ni dilgipa Mukul Sangma aro gipin dilgiparangba bakko ra·angtokaha.
Tom·bimonganiko ong·atna skang, TMC-ni national general secretary, Tura-ni Bishop Rt Rev Andrew Marak-koba grongeaha.
New Tura kal·chakramo jinma tom·bimonganio ua jinmana aganprakangengon, a·dokni manderangko pilak kamrangon nichanggalaha ine matnangenba, NPP-chi dilenggipa MDA sorkariko ra·galsrangchina gita a·dokni manderangko didiangaha.
NPP-ko ‘National Puppet Party’ aro MDA-ko Conrad Sangma-ni ‘My Development Alliance’ ine mingklakatengon, NPP-chi dilenggipa MDA sorkari, bilsi bongana maming namroro silroroaniko ra·bana man·jahani gimin re·baenggipa 2023 bilsini election-o NPP dol, Garo Hills-o biapko man·jawaha ine Banerjee parakataha.
“Da·alo chingna chakpaenggipa manderangko nie anga namen ma·sia, NPP-ni dilgiparang tuna cha·na man·tokgija donggnok. Batanggimin jabrina skangonin chinga manderangko chingni dolo biming segatna a·bachengaha aro da·alo chinga lak 1 manderangko segatna man·aha. Ia manderang da·alo chingna kamko ka·na ku·rachaktokaha aro mikkangchiba bang·a manderangan re·bakugen,” ine AITC-ni national general secretary parakataha.
Da·o jagittamni gisepo, Meghalaya a·dokni pilak jat aro toromni manderangan NPP-chi dilenggipa MDA sorkarini ka·sretgipa kamrangna ku·cholsan warachakaniko dakanggen ineba ua parakataha.
Banerjee-ni parakatani gitade, Meghalaya a·dokara pattian gapgipa biap ong·genchimoba MDA sorkarini a·selan a·kolrara dakgipa ramarang, skigipa gri skulrang aro kamgri ong·e dongenggipa chadamberangsa gapskaengachim.
“Da·alona kingkingan NPP, Election Expenditure report-ko on·kujaenga. Ia bilsibri atani gisepo maini gimin MDA sorkari chu·sokgipa ong·jaha anga NPP dolko jera ra·grikna gita ra·bienga,” ine AITC-ni MP parakataha.
TMC-ko Bengal a·dokni party ine matnanganirangko jegalatengon, PA Sangma sagini a·songo president-ni kamna susaani somoio uaba TMC-ni candidate ong·esa susaahachim aro iako pilakan ma·sina nanga ine Banerjee parakataha.
Meghalaya a·doko namroro silroroaniko ra·bagen ine ku·rachakaniko on·angengon, da·o jagittamni gisepon Meghalaya-o gital sorkariko rikgnok aro ia gital sorkari, a·dokni manderangko maming dakeba cha·bokjawaha ine Banerjee parakataha.