TURA: South West Garo Hills a·jani Mahendraganj Bazar ba Gopal Bari-o songdongenggipa manderang, re·anggipa October 20 tarikonin bijoliko man·jae neng·nikanirangko chagrongna nangtokenga ine jolo songdongenggipa manderang parakataha.
Ia jolo songdongenggipa manderangni parakatani gitade, iani bidingo songni manderang, MePDCL aro gipin cholrangoniko am·sandie nion, uamangoni mitamrang, bijoli jakkalani gitcham grorangko chotkujaengani gimin ia jolo songdongenggipa manderangna bijoli wataniko dontongataha ine ma·sina man·aha.
“Ia jolo songdongenggipa mitam nokdangrang gitcham bill-rangko gamkujaengani gimin ia jolo songdongenggipa gimik nokdangrangnan bijoli wataniko dontongatskaaha. Indiba kakketko sandie nigenchimode ian bijolini kajinako gilgipa manderangni a·selsa ong·aha maina indita jarangna bijolini kajinarangko gilchipgija baditaba jarangni bill-ko changsano on·ataha aro uandaken mitam nokdangrangnade gong 25,000 batpilerang bill sokahani a·sel da·o ia nokdangrang an·tangtangni bijoli bill-rangko gamna chol ong·tokjaengaha,” ine Mahendraganj Bazar-o songdongenggipa manderang parakataha.
Bijoliko man·jaengani a·sel dingtang dingtang neng·nikanirangko chagrongna nangtokengaha ine janapatengon, ia jolo donggipa mitam nokdangrangode diabetes sagiparang dongani gimin samrangko fridge-rango donesa jakkalna nangtokengachim indiba da·o fridge-rangko jakkalna gita bijoli dongjaengani gimin ian sagipa manderangna namen kenchakna nangani ong·enga ine jolni manderang parakataha.
“Ia antionin bang·bata skulrangon porikkarangba a·bachengtokengaha indiba bijoli dongjaengani a·selan chatro chatrirang poraianirangoba neng·nikanirangko chagrongna nangtokenga. Chatro chatrirang porikkao chu·sokgipa ong·jagenchimode uamangni mikkangchi poraianirangko nosto ka·a gita ong·gnok indide sawa iana daiko ra·gen,” ineba Gopal Bari-o songdongenggipa manderang sing·doataha.
Jolo songdongenggipa manderangni parakatani gitade, Gopal Bari ba Mahendraganj Bazar-o songdongenggipa manderangara bang·batan bading chiwale aro dokkanrangko dake cha·paenggipa manderangsa ong·achim indiba da·o bijoli dongjae uamang, dokkanrangko chalaianioba bang·en neng·nikanirangko chagrongna nangtokengahachim.
“Uni gimin ia jolo songdongenggipa manderangni neng·nikanirangko ma·sichakenba ia jolo transformer-ko chate on·piltaichina chinga mol·molatenga,” ine Gopal Bari-o songdongenggipa manderang parakataha.
