SHILLONG: Batanggimin bilsi bongani gisepo, Meghalaya a·doko dingtang dingtang dake so·sojengjeng ong·anirangchi aro COVID-19 sajinmani a·sel a·dokona re·baenggipa tourist-rang, champengatako man·na nangahani gimin a·doko Tourism-ni kamrang nangchakeaniko man·na nangskaengaha.
Shillong songjinmao hotel-rangko chalaienggipa mitam manderangni parakatani gitade, adita salrangna skang, a·doko a·sel ong·taianichi hotel-rango manderangni dongani 70 percent-mangni gita komiangtaiaha.
“Skang salrangode hotel-rango manderangni sokani gapchippilaiachim indiba da·ode hotel-rangona sokanirang namen komiengaha,” ine Shillong-o hotel-ko chalaienggipa manderang parakataha.
Indake ong·genchimoba, bading chiwalgiparang aro mitam tourist-rangde, baditaba jarangna skangan a·dokona re·bae dongkuengani gimin bang·a hotel-rangon manderang dongkuenga ine kobor on·aha.
Doctor-rangni tom·bimonganiko ong·ataniona bang·a doctor-rangan Shillong-ona re·batokahani gimin ia doctor-rangba hotel-rangon dongtokenga ineba kobor on·timgiparang parakataha.
Shillong songjinmao 2015 bilsioni 2018 bilsiona tom·tomanirangko nikna man·ahaoba, 2018 bilsio Harijan Colony-o dinggrikanichi so·sojengjeng ong·anirangko nikna man·piltaiahachim. Ua bilsio jasamangna so·sojengjeng ong·aniko nikna gita man·ahachim aro iani a·selan tourism-ni kamrang nangchakeaniko man·na a·bachengahachim.
Ia obosta ong·ani ja·man, ma·mong sorkarini Citizenship Amendment Act (CAA)-ko pass ka·draahani a·sel Meghalaya a·doko aro salgro salaramni gipin a·dokrangoba so·sojengjeng ong·anirangko nikna man·ahachim.
Ua somoio Ichamati-o dinggrikanikoba nikna man·ahachim aro Shillong songjinmao so·sojengjeng ong·anirangko nikna man·ahani gimin bang·a tourist-rangan a·dokko wate re·angpiltokahachim.
Ia obosta ong·ani ja·man 2020 bilsio a·dokonaba COVID-19 sajinma sokbaskaaha aro uandaken a·doko pilak kamrangan ja·donggaatako man·angahachim.
Re·anggipa 2021 bilsio COVID sajinmani obostarang adita namkalangahachim indiba Shillong songjinmao HNLC bobil dolni gitcham dilgipa Cheristerfield Thangkhiew-ko police-rangni so·otani ja·man so·sojengjeng ong·anirangko nikna a·bachengpiltaiaha.
