TURA: Shillong aro Tura-o donggipa North Eastern Hill University (NEHU)-ni casual worker-rangkoba kamo regularize ka·e gipinrang gitan apsan dormahako on·china dabitokengoba da·alonan ia dabianiko chu·sokate on·jaengani gimin casual worker-rang suk ong·gijaniko parakattokaha.
Koborko on·ani gitade, NEHU Tura campus-o kam ka·enggipa sak 200-mangni casual worker-rang donga aro uamangoni mitamde casual worker ong·e kamko ka·a da·o bilsi 30-mang ong·pilengahachim.
Supreme Court-ni on·gimin niam ‘Equal pay for equal work’ ba apsan kamna apsan dormahao pangchake, NEHU-o kam ka·enggipa casual worker-rang, an·tangtangni kamko regularise ka·china gita 2019 bilsionin dabina gita a·bachengahachim aro kam ka·enggiparang changni chang iani bidingo NEHU-ni dilgiparangna gisik ra·ataniko on·angahaoba da·onan uamangni dabianirangko knachakkujaengachim.
“Chinga indita bilsirangna casual worker ong·e kamko ka·engani gimin chingni man·gnirangko bariatchina dabitokengachim. 2018 bilsimangonin chinga chingni man·gnirangko bariatchina dabiengahachim aro iani bidingo changni chang chinga university-ni dilgiparangna sedoatahachim. Indake ong·genchimoba da·alona kingkingan chingni man·gnirangko uamang bariatkujaenga,” ine NEHU Tura campus-o kamko ka·enggipa casual worker-rangoni saksa parakataha.
Iani bidingo NEHU Tura campus-ni gital Campus-in-Charge-o sing·sandion, Tura campus-o kam ka·enggiparangni dabienggipani bidingo ua NEHU-ni Vice Chancellor-na u·iatahachim indiba da·ona kingkingan Shillong office-oni maming aganchakanirang dongkujaenga ine parakatskaahachim.
“Iani bidingo chinga bilsibrimangna skangsan ku·rangko on·chengahaoba skangonin chinga iandakgipa neng·nikaniko chagrongna nangtokengaha. Da·o ia kamko Guwahati-o donggipa DCLC-ona pakwatataha ine chingna u·iataha indiba kamrang namen ka·singengani gimin chinga suk ong·ja,” ine NEHU Tura campus-ni casual worker saksa aganaha.