Ja·ku de·na skang constituency-ni manderang baksa agangrikchenggen: Ampareen

SHILLONG: An·tangni constituency-ni manderang baksa agangrikchengani ja·man mikkang antiosa nanga gita ja·kurangko de·gen ine Congress doloniko ra·gala man·gipa East Shillong-ni MLA Ampareen Lyngdoh parakataha.

Bharatiya Janata Party (BJP)-o napchina gita uko BJP-ni dilgiparang didiahama ine sing·anina Lyngdoh, ia kattarangko aganchakaha.

BJP-o napchina gita uko BJP-ni dilgiparang gronge agangrikahama ine sing·anina aganchakaniko on·angengon, “Congress doloniko ra·gala man·gipa MLA-rang chinga pilakan, ching baksa agangrikna re·baenggipa dolrang baksa agangrikna kusi ong·aia,” ine Lyngdoh parakataha.

Maming ja·kurangko de·na skangba manderangni ku·pattianirangko name nichenggen ineba ua aganaha.

Ua National People’s Party (NPP)-o napna miksonganirang dongenga ine koborrangko man·soahaoba uko BJP-o napchina dilgiparang gronge agangrikahakon ine chanchichipanirangba dongskaengachim.

Batanggimin jarango, BJP dolni dilgiparang, East Shillong-ni MLA aro Trinamool Congress (TMC)-ni state president Charles Pyngrope-ko man·chape adita sak MLA-rangko grongeahachim ine koborko man·soaha.

TMC-ni sakgipin MLA George Lyngdoh-de BJP-o napchina didianiko jechakatskaahachim ineba nikna man·a.

Indake ong·engon, BJP dilgiparangni MLA-rangko grongeaniara namen ja·manchakdugaaha ine mitam MLA-rang parakatskaaha.

“Jadok ba jachet skang uamang angko grongea ong·ode haida anga uamang baksa re·angani cholrang dongachim indiba da·o anga angni constituency-o kamrang matchotangpilahaosa aro angni manderangna angni miksonganirangko parakani ja·manosa uamang angko grongeaha,” ine BJP-ni grongegipa MLA-rangoni saksa parakataha.

Get real time updates directly on your device, subscribe now.

Comments are closed.