Bajengdoba-o FOCUS, SHG-rangni program-ko ong·ata

RESUBELPARA: A·doko game ge·e cha·enggiparangna sorkarini ra·gatgipa FOCUS, SHG aro PROGRESS scheme-ni program-rangko Budbar salo, North Garo Hills a·jani Bajengdoba songo ong·atangaha aro ia program-ko ong·atanio Chief Minister-ni Advisor Thomas A Sangma, Bajengdoba-ni MLA Pongseng Marak, Mendipathar-ni MLA Marthon Sangma, Kharkutta-ni MLA Rupert Momin aro dingtang dingtang dilgiparangba bakko ra·angaha.
Ia program-ko ong·atanio Chief Minister-ni Advisor Thomas Sangma, mongsonggipa sokgipa ong·e jinmana aganprakangengon, a·dok sorkarini ra·gate on·gipa dingtang dingtang program-rangni bidingo talate on·angenba, ia program-rangko sorkari, a·doko namroro silroroaniko ra·bana aro manderangni namgnina ra·gate on·aha ine parakangaha.
“Meghalaya a·doko songdongenggipa manderangoni 80 percent-de gama ge·ani kamrangon pangchake janggi tangenggiparang ong·ani gimin game ge·e cha·enggipa manderangni janggi tangani gadangko tang·doatna gita sorkari, dingtang dingtang program-rangko ra·gate on·aha,” ine Sangma aganaha.
Iandakgipa scheme-ni namgnirangko ra·na man·na gita bimingtangtangko segatchina Bajengdoba jolni manderangko didiangengon, FOCUS aro FOCUS Plus scheme-ni ning·o game ge·e cha·enggipa nokdang ge·antinan gong 5000 tangkarangko on·e, game ge·e cha·enggipa manderangni janggi tangani gadangko namdapatna sorkari kam ka·enga ine Sangma parakataha.
Ia program-ko ong·atanio FOCUS aro FOCUS plus program-ni gong lak 68 tangkarangko sak 6000 manderangna suale on·angaha.
Koborko on·ani gitade, FOCUS scheme-ni ning·o Bajengdoba C&RD Block-ni gimik dol 210 producer group-rang gimik gong lak 1.35 tangkarangko man·aha.
Ia apsan tom·anion, NRLM-MSRLS-ni ning·o gong lak 21.5 tangkarangkoba dol 5 village organisation-rangna suale on·angaha aro PROGRESS scheme-ni ning·o wak bi·sa aro kuroiler do·orangkoba, seoka man·gipa manderangna suale on·angaha.