BAGHMARA: Re·anggipa Bristibar salo, NABARD-ni dakchakanichi BAKDIL dolni gita self help group (SHG)-rangni Exhibition-cum-Sale program-ko Baghmara-ni BAKDIL Training Centre-o ong·atangaha aro ia program-ko Rongara-ni Block Development Officer (BDO) Halley Sangma, do·ga oe on·angaha.
Ia program-ko ong·atanio Rongara BDO, jinmana aganprakengon, SHG-rangni bosturangko mesokna aro palna sim·na gita Exhibition-ko ong·atna dakchakanirangko on·ahani gimin NABARD-ko mittelpilangenba, iandakgipa program-ko ong·atanichi SHG-rango bak ra·enggipa me·chikrangni janggi tangani gadangko namdapatna dakchakani ong·gen ine parakataha.
Manderangna loan-rangko on·e dakchakna aro bank-ni kamrangko sepangbatatna gita Rongara-o bank branch-ko kulina nangengani giminba ua ia tom·anio aganangaha.
Ia program-ko ong·atanio dongpae jinmana aganprakanggipa gipin manderangara, NABARD-ni District Development Manager Khelchandra Chongtham, Meghalaya Rural Bank Baghmara Branch-ni Branch Manager Rajdeep, BAKDIL-ni Director aro Secretary Fr Cyril Sangma aro gipinrang ong·a.
Ia exhibition-ko ong·atanio dingtang dingtang SHG-rang, an·tangtangni tarigipa morarang, acharrang, juice-rang, me·surang, ba·ra kancharang aro dingtang dingtang bosturangko dam 15 stall-rango mesokna aro palna sim·na gita cholko man·aha.