SHILLONG: Re·baenggipa 2023 bilsini Assembly election-o BJP dol, sak 31 MLA-rangko man·e sorkariko rikna man·genchimode a·doko Inner Line Permit (ILP)-ko ra·gate on·gen ine a·dokni BJP MLA aro Cabinet Minister Sanbor Shullai, ku·rachakaniko on·angaha.
Meghalaya a·doko ILP-ko ra·gatchina aro Khasi-Garo ku·sikrangko Indian Constitution-ni Eighth Schedule-o ra·napchina dabienggipani bidingo sing·anina aganchakaniko on·angengon, “Chingna sak 31 MLA-rangko on·e chegopna dakchakgenchimode chinga na·simang maiko nanga uko on·aigen,” ine Shullai parakataha.
Batanggimin chang election-rangoba ua iandake manderangna ku·rachakanirangko dakrongachim ine nikna man·a.
2019 bilsini April jao ong·atanggipa Lok Sabha election-oba ua, Meghalaya a·doko aro salgro salaram a·dokrango Citizenship (Amendment) Bill-ko ra·gatgenchimode a·songni Prime Minister Narendra Modi-ni mikkangon an·tangko ‘so·otna’ ka·mikkenataniko on·angahachim ine nikna man·a.