SHILLONG: 2024 bilsini Lok Sabha election-ona kingkingde Meghalaya a·doko Inner Line Permit (ILP)-ko ra·gatchina dabiani chu·sokgipa ong·kujanaba gnang ine Sombar salo, East Shillong-ni gitcham MLA Ampareen Lyngdoh parakataha.
Iani bidingo kobor ra·timgipa manderang baksa agangrikengon, 2024 bilsini Lok Sabha election-ona kingkingde ma·mong sorkari dingtang dingtang kamrangni gimin chanchina nangani bang·kuengani gimin a·dokni manderang, ILP-ko man·na ka·dongani dongkuna nangjawa ine Lyngdoh parakataha.
“2024 bilsio Lok Sabha election-ko ong·atani somoiosa a·dokni manderang, ILP-na dabianiko a·bachengatna nangpiltaigen,” ine ua aganaha.
ILP-ni bidingo ua NPP aro gipin dolrang baksa nangrime dabiangkugen ineba Lyngdoh, ku·rachakaniko on·angaha.
East Bengal Frontier Regulation 1873-o pangchake Meghalaya a·doko ILP-ko ra·gatchina gita 2019 bilsion a·dokni sak 60 MLA-rang, resolution ra·e soi ka·ahachim aro iako a·dokni manderang gisik ra·na nanga ineba Lyngdoh parakataha.
“An·chingni sorkari bilakgipa ong·ode ILP gita dakgipa kamrangni bidingo pangnan namgipa ja·kuko de·dilaigen. NPP aro bakrimenggipa dolrangba Meghalaya Residents Safety & Security Act-ko ra·gatna tik ka·manaha aro angni chanchiani gitade ian namgipa ja·ku de·ani ong·enga,” ine ua aganaha.
Lyngdoh-ni parakatani gitade, Parliament-o pass ka·na nangkuenggipa ILP-ko a·doko bilakgipa ong·atna gita taridapna nanganirangba dongkuengachim.
“A·dokni manderangna aro a·dokni tourism-na namgni ong·na gita MRSSA-koba taridapaha aro apsan daken ILP-ni dingtang dingtang rokomrangkoba man·gen. Iani bidingo a·dokni manderang, India sorkariko didina man·na nanga,” ine ua aganaha.
Assam aro Meghalaya a·dokni simarango ru·utbea bilsirangna meligrikgijaniko NPP namatna man·gen ineba East Shillong-ni gitcham MLA, an·tangni ka·dongchakenganiko parakataha.
A·dok damgnini simarango ong·enggipa golmalrangko namatna gita skanggipa bakni kamrangkode matchotmanaha ine janapatengon, gnigipa bakoba apsan nangrimen kamrangko ka·angkugen aro skanggipa bako jekai manderangni nangnikani gita ja·kurangko de·aha apsan daken gnigipa bakoba ja·kuko de·angkugen ine Lyngdoh parakataha.
Khasi aro Garo ku·sikrangko Indian Constitution-ni Eighth Schedule-o napatchina dabienggipani bidingo janapatskaengon, iani bidingo a·dok sorkari, pilak nangchongmotgipa lekkarangko India sorkarina watatmanaha ine East Shillong-ni gitcham MLA parakataha.
HNLC bobil dol baksa tom·tomanina agangrikenggipani gimin janapatskaengon, ia agangrikaniko namao aro tom·tomao matchotatna man·na gita ta·rakbate ja·kurangko de·na nangenga ine Lyngdoh parakataha.