SHILLONG: Cabinet Minister Dasakhiatbha Lamare-ni Nongkrem-o tangka suala ine matnanggipako sandiani report maidake ong·enga uni koborko TMC National spokesperson Saket Gokhale sing·ataha
Tangka suala ine Cabinet Minister Dasakhiatbha Lamare-ko matnanganiko sandigipani bon·kamgipa report-ko Gokhale mijalo, East Khasi Hills DC-o mol·molataha, jekon a·dok sorkarina pakwatman·ahachim.
Tangka suala ine matnanggipani bidingo Enforcement Directorate (ED)-na u·iatama u·iatja aro bon·kamgipa enquiry report-ko ED-na on·ama on·jako ukoba Gokhale, DC-o sing·ataha.
Bon·kamgipa enquiry report-ko East Khasi Hills District Administration-oniko sengenga ine re·anggipa October 2022-o Deputy Chief Minister Prestone Tynsong aganahachim. Indakoba bon·kamgipa enquiry report-ko da·alonaba jinmana parakatkuja ine Gokhale aganaha.
“Election-ni Model Code of Conduct-ko ra·gatna skangde tangka sualoba niamni kosako ong·kuja ine Deputy CM Tynsong a·kange aganahachim, unigisepon jeba receipt amount tangkarangko sualgenchimode uan Prevention of Money Laundering Act, 2002-ko man·chape dal·begipa niamko pe·a ga·aka” ine Gokhale aganaha. Unomitingo, hisap-ki·tap gri official ong·gija tangka jakkalaniko aro manderangna sualanirangkode district administration aro police nirokna nanga ineba ua agandapaha.
“Unbaksana, saksa cabinet minister ong·e tangkarangko niamgri sualaniara, baoniko sualachim, ian dal·begipa sing·anio ga·aka. Unigimin indaka kamrangko district administration, Enforcement Directorate-na u·iatna nanga,” Gokhale aganaha.
