SHILLONG: Rambrai-Jyrngam constituency-ni MLA Kimfa Sydney Marbaniang, an·tangni MLA ong·aniko watani ja·man Bristibar salo National People’s Party (NPP)-o napangskaaha.
Marbaniang-ko NPP-ona rimchaksona tom·aniko ong·atanio NPP-ni national president aro Meghalaya a·dokni Chief Minister Conrad K Sangma baksana a·dokni Deputy Chief Minister Prestone Tynsong, NPP MLA Sniawbhalang Dhar, NPP MLA Macmillan Byrsat, NPP MLA Dr Ampareen Lyngdoh, NPP MLA Mohendro Rapsang aro NPP-na chakpaenggipa ritchani ritcha manderangba bakko ra·angtokaha.
Rambrai-Jyrngam-ni MLA Kimfa Sydney Marbaniang-ba Congress doloniko ra·gala man·gipa sakbonga MLA-rangoni saksa ong·achim aro NPP-o napna skang ua Budbar salon, an·tangni MLA ong·aniko watna Assembly-ni Speaker Metbah Lyngdoh-na kam watani chittiko on·eahachim.
Congress doloniko ra·gala man·gipa gipin MLA-rang, chong·motan Ampareen Lyngdoh aro Mohendro Rapsang-ba adita salrangna skangsan, MLA-ni kamko watenba NPP-o napangtokahachim.
