SHILLONG: Ia bon·angenggipa 2022 bilsiko nipilatgenchimode Meghalaya a·doko bang·en so·sojengjeng ong·anirangko nikatna gita man·aha.
Ia bilsini January 30 tarik attamo Shillong songjinmani Khyndailad-o Improvised Explosive Device (IED) bomako gopretanichi ia 2022 bilsio so·sojengjeng ong·aniba a·bachengahachim.
Ia IED boma, Delhi Mistan Bhandar dokkani mikkango donggipa Shillong Wine Store sambao gopretahachim indiba ua salara Robibar sal ong·e manderang komiahani gimin darangba saknaanirangko man·jahachim.
Ia apsan bilsion ma·mong aro a·dok sorkarirang, Meghalaya a·doko bobil dake chakatenggipa Hynniewtrep National Liberation Council (HNLC) dol baksaba agangrikaniko dakna a·bachengatahachim aro iani bidingo sorkari, HNLC bobil dolni manderangna naljokani donggipa ramarangkoba on·ahachim.
Sorkari baksa agangrikaniko a·bachengna gita HNLC bobil dolni dilgiparangba Bangladesh a·songoni Shillong-ona re·baahachim indiba indake ong·engon, HNLC bobil dolni adita sak dilgiparangko National Investigation Agency (NIA) court-ni gita re·baenggipa January 4 tariko mikkangpaechina gita ge·etaniko on·atskaaha.
2020 bilsini December 12 tariko, East Jaintia Hills a·jao boma gopretgipani bidingo NIA, HNLC bobil dolni sakbri dilgiparangko charge sheet file ka·ahachim.
Assam aro Meghalaya a·dok damgnini simarango indita bilsirangna meligrikgijanirang ong·engon, re·anggipa November jani 23 tariko Assam-ni police aro Forest guard-rang, Meghalaya a·dok ning·o donggipa Mukroh songona re·bae skatang goani a·sel songni mande sakbonga so·otako man·skana nangahachim.
Ia a·sel ong·ani ja·mano Meghalaya sorkari, ia a·selni bidingo DIG (Eastern Range)-ni dilanichi sandirokna gita special investigation Team (SIT)-ko on·aha aro kamoni neng·takgimin Justice T Vaiphei-ni judicial inquiry-ko dakna ge·etaniko on·angskaaha.
Ia a·selni bidingo Meghalaya a·dokni Chief Minister Conrad Sangma, Union Home Minister Amit Shah-ko gronge agangrikani ja·man, ia a·selni bidingo CBI-chi inquiry-ko dakna ma·mong sorkariba ra·chakangahachim.
Indake ong·engon, ia bilsini July jao, Tura Edenbari-o donggipa Tura-ni MDC aro BJP Meghalaya-ni state vice president Bernard N Marak-ni ‘Rimpu Bagan’-ko police-rang chadrapeaha aro ua biapo roenggipa me·a aro me·chikrangko rim·ahachim.
Ia a·sel ong·ani July jani 22 tariko ong·ahachim aro a·sel ong·ani ja·man Tura-ni BJP MDC Bernard Marak, katchipe dongahaoba uko July 26 tariko Uttar Pradesh a·dokoniko police-rang rim·na man·ahachim.
Marak-ni kosako dingtang dingtang case-rangko ra·gate rim·ahaoba November-ni 14 tariko Meghalaya High Court, una jaminko on·e pattokoniko jakgitel watpilskaahachim.
Iana agreba, May jani 30 tariko, Nongrah Nonglum jolo donggipa Wahktieh songo, mande saksa an·tangni bilsi 4 aro bilsi 2 ong·kuenggipa bi·sarangkon gitok rageke so·otgalahachim aro dosko dakgipa mande Joefreeson Jana, ia a·sel ong·ani ja·man kate chakahaoba uko May jani 31 tarikon rim·na man·ahachim.
September-ni 11 tariko, pattokoni joke katgipa koidirangko West Jaintia Hills a·jani Shangpung Thadmuthlong songo manderang jinma so·ote galskaaha aro ia sakbri koidirangara, I Love You Talang, Lodestar Tang, Shidorki Dkhar aro Rikmenlang Lamare ong·achim.