TURA: Dingtang dingtang kamrangna BJP-chi dilenggipa ma·mong sorkari tangka paisarangko chame on·atahaoba ia tangka paisarangko Meghalaya a·doko NPP-chi dilenggipa MDA sorkari, SHG, FPO aro uandakgipa dingtang dingtang dolrangna sokate on·jaenga ine Robibar salo, Tura-ni MDC aro Meghalaya BJP-ni state vice president Bernard N Marak matnangataha.
“Ma·mong sorkarini chame on·atgipa tangka paisarangko man·na nangenggipa dolrang man·tokkujaenga aro iana NPP-chi dilenggipa MDA sorkari aganchakaniko on·na nanga. Tangka paisarangko da·onan ia dolrangna uamangni account-rango chipatkujaenga. Iandakgipa scheme-rangni bidingo department-rang aro administration, manderangna u·iatna gita maming ja·kurangko de·jaenga. Ia tangka paisarangko man·na nangenggipa dolrang man·sokujaenga ine ma·mongni dilgiparang ma·sina man·aha aro administration, iani bidingo union minister-rangna aganchakaniko on·na nanga,” ine Marak parakataha.
Tura MDC-ni parakatani gitade, adita salrangna skang, Union Minister of State John Barla-ni Garo Hills-ona re·bae Modi sorkarini ra·gate on·enggipa scheme-rangko nipilangon, a·dok sorkarini aro department-rangni chu·sokgijanirangko bang·en nikna gita man·ahachim.
“Veterinary & Animal Husbandry-ni Union Minister-ba bakan Garo Hills-ona re·bae, sorkarini kamrangko niangna sienga. National Livelihood Mission (NLM)-ni ning·o SHG-rangna, FPO-rangna aro register ka·gimin dolrangna tangka paisarangko watataha aro da·o uamang an·tangtangni account-rangko kulina aro pilak lekkani kamrangko matchotatchina u·iataha. Ia jolrangona union minister-rang re·bajringengani a·selsa SHG, FPO aro club-rangni account-rangko aro gipin nangchongmotgipa lekkarangko sandina a·bachengenga,” ine Marak parakataha.
Man·na nangenggipa manderangna tangka paisarangko sokate on·jaenga aro iako BJP namen ma·sienga ine janapatengon, SHG-rangnaba National Livelihood Mission (NLM)-ni ning·o on·enggipa scheme-rangko on·jaenga ine BJP-ni state vice president matnangataha.
Indake ong·engon, Union Veterinary Minister-ni Garo Hills-ona re·baani somoio maiba badi ka·na nanganirang donggenchimode ka·china gitaba Marak, SHG-rangko, FPO-rangko aro dingtang dingtang dolrangko didiataha.