Voter-rangko ropna jotton ka·anina Pala, BJP-ko matnanga

SHILLONG: Ong·nasienggipa Assenbly election-rang ja·mano uamang donggijade gitalgipa sorkariko rikna gita man·jawa ine a·kange a·dokni manderangko salna jotton ka·anina Meghalaya-o Congress,  Bharatiya Janata Party-ko matnangaha.
“Uamangni dakna-ka·na nangchongmota ine donanirangko ra·chakjaenga indake a·dokni manderangko ka·mikkenatna amenga ine talen ma·sina man·enga. Democracy-o manderangni on·gimin nangchongmotgipakosa ra·chakgen,” state Congress chief, Vincent H. Pala, The Shillong Times-na aganao aganaha.
BJP-chi dilenggipa NDA sorkari dingtangmancha a·dokni aro salgro-salaram a·jolna maming dingtangmancha namroro-silroroani kamrangko mamingkon ka·a dongja, ua aganaha.   government has not done anything special for the development of the state in particular and the north eastern region in general.
Ma·mongo skango Congress-chi dilenggipa sorkari rama-sorokrangko namdapatna North Eastern (SARDP-NE)-ni ning·o gong 56,000 tangka-paisako donako ua janapaha.
“Indiba indakgipa ja·ku de·anirangko NDA sorkari de·a dongja. Ma·mongni bang·a scheme-rangko baksa ra·galaha,” MPCC president aganaha.
Chief Minister Conrad K. Sangma-ni dilgipa ong·ani ning·o NPP-chi dilenggipa sorkari batanggimin bilsi bonga bilsirango ma·mongoniko maming dingtangmancha dakchakatanirangko man·soa dongja, Pala aganaha.
“Ma·mongni kajinarango a·dokni sualgipani 41%-kosan a·dok sorkari man·aia. Ua bilsi bonga bilsirango a·dokna tangka-paisa chamdapatanirang dongja,” ua aganaha.
BJP ku·chilosanmangmang kam ka·aia, saffron party uamangni chanchia gita dakna jotton ka·enga aro a·dokni manderangko ka·mikkenatenga, MPCC chief aganaha.
“Uamangni basegipa toromko ja·rikna manderangni liberty-ni kosako chakatna BJP jotton ka·engako chinga nikna man·engaha. Iako chu·gimik ra·chakna man·jawa,” Pala aganaha.
Sakgni MLA-rangsan dongaigenchimoba 2018 Assembly election-rang ja·mano sorkariko rikanio BJP dal·begipa kamko ka·aha, da·o ong·nasienggipa election-rang ja·manoba apsan obosta ong·ode dilgiparangni kammanchako nikgen, ua aganaha.
“An·tangtangko pale ba uamangni chanchiako uamang rim·kingkingode BJP-ni kamchi chingni dilgiparang sina nangode unosa chinga ma·sigen. Chingni manderangni mikkangchiko chinga bame on·a nangjawa,” ua aganaha.
Uamang party-ni candidate-rangna puonjaode election ja·manni obosta puongiparangna kenaniko uamang dakna a·bachengaha bang·a constituency-rango BJP dilgiparang uamangni election campaign-o ong·enga, Pala matnangaha.
“Ong·nsienggipa election-rango BJP-ni candidate-rangko jegale rakgipa kattarangko an·ching watna nangenga,” ua agandapaha.
Uamangni chakpaaniko man·gijade a·doko re·baenggipa changni sorkariko darang party-ba rikjawa ine uamangni a·kanganiko a·bachengao Trinamool Congress (TMC) dilgipa aro Chief Minister gitcham Mukul Sangma-ba BJP-ko matnangaha.
BJP-ni a·kangani puongiparangko adita namgija dakenga ine Sangma aganaha. ‘‘Uamang maiko agana jotton ka·enga? Uni ortode uamang MLA-rangko brena jotton ka·enga ong·jama?’’ ua sing·doaha.
Cha·bok-rusianio BJP bak man·pana jotton ka·enga, puongiparangko namgija dakna jotton ka·enganiko mesokenga aro party-ni aganako nirike ma·sina man·enga. ‘‘A·dokni manderang uamangna kragipa aganchakaniko on·a nanggen anga chanchia,’’ ua agandapaha.
2018 Aseembly election-rango Congress dal·batgipa party ge·sa ong·genchimoba NPP-chi dikenggipa sorkariko sorkari rikatna BJP-ni kamrang maikai ong·achim uko manderang raken sandiaha, Sangma aganaha.
“Remote-control-chi rikgipa sorkarina manderang aro a·dok namgniko on·enga. Uni gimin uamang MDA-ni apsan namgija kamko dakpiltaina amenga,’’ ua aganaha.