SHILLONG: Chief Minister Conrad K Sangma-ni matchotgija nokdonggae on·anggipa project-rangko man·chape gitcham sorkarirangni matchotchipgija donanggipa pilak project-rangkon Bharatiya Janata Party (BJP) matchotate on·gen ine Mongolbar salo, Meghalaya a·dokni manderangna ku·rachakaniko on·ataha.
BJP Meghalaya-ni state president Ernest Mawrie-ni parakatani gitade, a·dokni bang·a gitcham sorkarirangan election-na skangsa pangchakani ro·ongrangko songe on·an baksana matchotkugijagipa bang·a project-rangkon a·bachengdrae on·angaha indiba ia chang election-o BJP sorkariko rikna man·genchimode, ia gitcham sorkarirangni matchotatchipgijagipa project-rangko matchotate on·na man·gen.
“Election-na skang pangnan Meghalaya a·doko iandake manderangko salna gita matchotgijagipa project-rangko a·bachengate on·ronga aro bang·a project-rangnan pangchakanirangko songe on·ronga. BJP-ni 100 Days Priority Plan-ni bak gita BJP-chi dilgipa sorkari, Meghalaya a·doko matchotchipgija dongenggipa project-rangko sandie sechimongna gita committee-ko songgen aro ia project-rangko nangani kri matchotatna kamko ka·gen,” ine Mawrie parakataha.
Election-na skang bang·bea project-rangko nokdonggae aro a·bachengate on·mikachi NPP sorkari, manderangko cha·bokna jotton ka·enga ineba BJP-ni state president matnangataha.
“NPP-ni chalakki dakako manderang nikna man·enga aro bilsibri atana maming kamko ka·gija da·o election-na skangsa ia kamrangko mesokenga ine ma·sia. Iandakgipa kamrangna manderang NPP-ko namniktokjaha,” ine Mawrie parakataha.
Meghalaya a·doko sorkari kim·kimgipa ong·chinasa BJP, MDA sorkario bakrimaha ineba ua parakataha.
“Bilsi bongana chinga a·doko kim·kimgipa sorkariko nikna skani giminsa NPP-chi dilgipa sorkario bakrimaha indiba sorkarini ong·gija dakgipa kamrangna pangnan ku·rangko on·aha,” ine NPP-ni state president parakataha.
BJP, a·dokni manderangna kamko ka·gen aro je project-rangan a·dokna namgni ong·genchim, uandakgipa project-rangko uamang chu·sokate on·gen ineba Mawrie parakataha.