Don Bosco College-o CUET-ni bidingo workshop-ko ong·ata

TURA: Re·anggipa January 9 tarikoni 12 tarikona, Tura-ni Don Bosco College Higher Secondary Section, North Eastern Hill University (NEHU) Tura campus baksa nangrime, Class 12-ni chatro chatrirangna CUET-ni bidingo aro ma·a paarangnaba ‘Importance of Parenting’ ba ma·a paa ong·e dedrangko dal·atani gamchatani bidingo workshop-ko salbrina Don Bosco College Higher Secondary Section-o ong·atangaha.
Ia workshop-o skie on·anggipa manderangara, NEHU Tura Campus-ni ning·o donggipa College Welfare & Advisory Committee-ni Chairman Dr B Mathew aro Auxilium Convent baksana Auxilium Secondary School Tura-ni Head Sister Marcelina S Sangma ong·a.
Ia workshop-ko ong·atanio gimik sak 650 chatro chatrirang aro sak 400 ma·a paarang bakko ra·angaha.
CUET-ni bidingo Dr B Mathew, chatro chatrirangna agan-talate on·angengon, CUET-ko sena register ka·ani, porikkako seani, question-rangni rokom, form-rangko gapatani, syllabus aro CUET-o nangchakegipa dingtang dingtang kamrangni gimin talate on·angaha.
Ia workshop-ko ong·atanio Sr Marcelina, ma·a paarangna agan-ku·pattianirangko on·angskaengon, dedrangni poraianio dongpaani, somoiko sualani aro dedrangko nirok sandiani bidingo agan-talate on·angskaaha.