AMPATI: Sukrobar salo, a·dokni Chief Minister Conrad K Sangma, Greater Garobadha Water Suppply Scheme-ni Water Treatment Plant baksana Systematic Maintenance-ni ning·o AMPT (103rd km-124th km)-ni Periodic Renewal-ko aro km 3 AMPT ramaoni intermediate lane-ko man·chape km 11 ong·gipa Garobadha-Selsella-Balachanda ramako a·bachengate on·angaha.
Ia project-rangko a·bachengate on·angani somoio a·dokni Chief Minister, jinmana aganprakangengon, bilsi 20-na skang tarigipa ramarangna bate batanggimin bilsi bongani gisepon ia sorkari, gipin a·songrangni dakchakanirangchi aro gipin scheme-rangchi ramarangko bang·bate tarie on·na man·aha ine parakataha.
“Ia kamrangko nie an·ching pilakan baditana kingking ia sorkari, ma·mong sorkarini scheme aro gipin a·songrangoni dakchakatgipa tangka paisarangchi rama jal·langrangko tarie on·aha, nikna gita man·enga,” ine Sangma aganaha.
Ia ramarangko tarianichi an·seng baljokani, bading chiwalani, tourism aro uandakgipa dingtang dingtang kamrangko namdapatskana man·enga ine janapatengon, ia ramarangko somoi gita matchotate on·ahani gimin ia department-ni engineer-rang, officer-rang aro contractor-rangkoba mittelpilangaha.
Garobadha-Selsella aro Garobadha-Tura ramarangara manderangna namen gamchatgipa ramarang ong·a ine janapatengon, Meghalaya a·dokko man·aoni bilsi 50 gappilahaoba ia ramarangko indita bilsirangna galchipahachim indiba ia sorkari, ia ramarangko da·o taripile on·aha ine Chief Minister parakataha.
Ia jolrango ringani chirangko chu·onga gita man·jaengani a·selan jolo songdongenggipa manderang bang·a neng·nikanirangko chagrongna nangtokengachim ine janapatengon, da·alo Jal Jeevan Mission aro uandakgipa dingtang dingtang scheme-rangchi a·dok gimiko lak 3-na baten nokdangrang ringani chirangko noktangtangona soke man·engaha ine Chief Minister parakataha.
Official-rangni u·iatani gitade, Greater Garobadha Water Supply Scheme-chi, Rongram, Selsella, Betasing aro Rerapara C&RD Block-ni ning·o donggipa dam 96 songrang aro te 8995 nokdangrang namgniko man·gnok.
Iana skang a·dokni Chief Minister Conrad K Sangma, Rerapara C&RD Block-ni ning·o donggipa Dengnakpara songo Manchak Integrated Village Cooperative Society (IVCS)-ni Multi Facility Hall-koba nokdonggae on·angaha.