SHILLONG: Bilsi 5-na skang, kamgri ong•aniara Meghalayani mongsonggipa neng•nikani ong•achim. NGT-ni koila bikotaniko dontongatani aro uandake manderangni janggi tangani chol donggijanirang sokbae, unomiting dilenggipa a•dokni skotong minister Mukul Sangma chadamberangna janggi tangani cholrangko bikotani namen chu•sokgijani ong•aha. Karkanarang donggijanichi, gipin janggi tangani cholrang donggijanichi aro changa-sapanirangko skiani program-rang donggijanichi Meghalaya namen neng•nikanirangko man•aha. Conrad Sangma-ni dilenggipa MDA sorkari ia obostako namatna gita namen rakbegipa kamko man•aha. Uni kosako, uni sasonni somoio bang•bata somoion Covid-19 sabisiko man•e neng•nikanirang sokbaaha. Indake ong•anichi,Meghalayani chadamberang nampilna mamung ka•donganiko nikjaha.
Meghalayao bilsi 20-40 ong•gipa manderang lak 11.5 donga. Ian a•doko songdonggipa manderangoni 30% gita ong•enga. Janggi tangani cholrang komia aro manderangni changa-sapanirang bang•bea aro bang•roroenga. Indake ong•engon, maiba dingtangmanchagipa cholko dakna nanganiona ga•akaha.
Conrad Sangma an•tangan bading-chiwalaniko dakgipa mande ong•e, ia cholko dakna bikotaha. Kamrangko sandigiparangni palo ia mandeskana kamrangko on•giparangko ong•atna tariaha. Iako dakna gita PRIME Meghalayako a•bachengataha. Ia programni gita manderangko skie on•na, kam ka•togipa namgipa bi apko on•na, aro a•doko bading-chiwalgiparangko nambate tarina gita miksongaha. Iano minggni kamrangko ka•na miksongaha- bading-chiwalna chanchiani dongode uko chu•sokgipa ong•atna,aro minggipinara bading-chiwalaniko an•tang chone a•bachengode, uko dal•dapatna.Uandaken PRIME scheme chadamberangna cholrangko on•enga, indiba mikkang jao electionrang ong•anichi Ia PRIME-ara baigipa ong•genma?
Da•alona kingking sak 1,500 bading-chiwalaniko a•bachengdilgiparangko PRIME dakchakaniko on•aha. Tangka-paisarangni bidingo dakchakani, skie on•ani, agan-ku•pattiani aro kam ka•dimani biaprangko uamangna on•aha. PRIMEni bang•a chu•sokgipa kattarang donga. Tangka-paisarangni bidingo dakchakaniko man•gijanian mingsa bading-chiwalaniko a•bachenggipa manderangni uamangni kamrango mingsonggipa neng•nikani ong•aha. Bankrangoniko srona gita altuae man•gijanian micro, nano aro solo enterpriserrangna mongsonggipa neng•nikaniko on•ha. West Garo Hills, Turani, Semada Marak PRIME-oniko bilsisana baten dakchakaniko man•engaha ine aganaha. Dingtang dingtang u•i-ma•sigipa badingg-chiwalgiparangkoba ua grongaha jemangan uko agan-ku•pattie on•aha. Uamangni uni chanchisoanirangko namdapataha aro uni bading-chiwalanirangko namdapatan dingtang dingtang cholrangko mesokaha aro agane on•aha. Uni bading-chiwalanio ua biaptangni me•chikrangko rimchimonge dingtang dingtang rikgitokrang, natapsirang aro uandakgipadangko taria. PRIME a•bachengao lak 5-ko on•a aro ja•mano dal•dapatna gita sud gri srona gita lak 25-ko on•a.
Sohra-o Ryngud songni Odreena Gracia Shangpliang, jean O’Shan Organics-ni nokgipa ong•a, ua chasongnaba da•o gita an•tangni chu•sokaniko jumang niksojachim. Uni kam ka•anio da•o ua bija bitchi, Citrus Maceoptera juice, aro dingtang dingtang bosturang jekai Lakadong holdi, gulmoris, aro e•ching ginderangko aro uandakgiparangko tarienga. Ua CM E-Championship challenge-oni nambatgipa sak 25 bading-chiwalaniko a•bachengdilgiparangoni saksa ong•a. Una kam ka•e on•giparangoni bang•bataan uni songsul-noksulo donggipa me•chikrangan ong•a jerangan una bosturangko tariaoni uarangko bil•e tariaona dakchakenga. Ua uni bading-chiwalaniko dal•dapatna miksongenga, aro bang•bata manderangko rakkina chanchienga, aro noko kam ka•chakaoni PRIME-ni on•gipa kam ka•chakani bial J.N. Stadium-ona jitna chanchienga. Uni dontonggija tikkelanichi Odreena-oniko ton 30 bosturangko June 2021-o Mumbaioni badinggipa am•ataha. Ua songtangoba tarichakani biapko a•bachengatgen, uandaken Sohrao donggipa songni manderangna janggi tangani cholrangko on•gen.
Adita salrangna skang, AITC MYE ingipa gital schemeko parakataha, jeon lak 3 chadamberangna kamrangko on•a ku•chakaha. Ia apsan chadamberangkon ia schemeko a•bachengatgiparang galchipahachim. Da•o uamang uamangna West Bengal-oni agan-skie on•giparangoniko skie ra•aha ine agannaba donga. Indiba West Bengal a•jara da•o pangnana baten silroro-namroroanirang dongjaenga. Je a•dokon changsao kharkanarang bang•en dongachim, da•o uno TMCni sasonni ning•ao mamungan dongjaengaha. Ia apsan political partyan Ratan Tata-ni karkanako (jeon da•o sak 10,000 chadamberangko Sanandao rakkienga) game cha•giparangni namgnina ine tol•e an•tangtangni man•gnina a•dokoniko a•rikataha. Bengalni chadamberangna mamung cholrangkon on•na man•jaha. Indide, iandakgipa Bengal-oni dilgiparang maidake an•chingni chamderangna cholrangko on•gen?
PRIME-ni kam ka•ani aro mikkangchi chu•sokanirang da•o Meghalaya-ni manderango pangchaka, chong•motan Meghalaya da•o Singur gita chacha ong•genma (je biapon Tata Motors Factory-ko West Bengal-o a•bachengatnasiachim) ma PRIME Meghalaya-ni chadamberangna tanggi tangani cholko on•gen, ian chadamberangna sing•ani ong•enga.