TURA: All India Trinamool Congress (AITC)-ni chairperson aro West Bengal a·dokni Chief Minister Mamata Banerjee baksana AITC-ni national general secretary Abhishek Banerjee, Budbar salo North Garo Hills a·jaona re·baaha aro uamangko Meghalaya AITC-ni dilgiparang aro hajalni hajal manderang rimchaksotokaha.
AITC-ni chairperson-ko rimchaksona gita AITC-ni jinma tom·bimonganiko Mendipathar-ni Dilma A·pal kal·chakramo ong·atangaha aro ia tom·bimonganio Garo Hills-ni dingtang dingtang biaprangoni hajalni hajal manderang re·bae bakko ra·angtokaha.
Ia tom·bimonganio AITC-ni chairperson aro West Bengal-ni Chief Minister Mamata Banerjee, jinmana aganprakangengon, a·songko bak dakna jotton ka·enggipa BJP sorkariko ra·galna man·na gita AITC-ko seokskachina Garo Hills-ni manderangko didiangaha.
“TMC dolmangmangsan na·simangna namgipa sorkariko on·e, chadamberangni, chatro chatrirangni aro me·chikrangni jumangrangko chu·sokatna dakchakgen ine agannasa anga ia biapona re·baaha. Me·chikrangna anga ‘Lakshmi Bhandar’-ko on·enga aro iachi anga nokdang ge·antini me·chikrangna gong 1000/- tangkako on·gen,” ine Banerjee parakataha.
Re·anggipa December jao Banerjee-ni a·dokona re·baani somoio, WE Card scheme-ko a·bachengate on·angenba, Meghalaya a·dokni me·chikrangko bil gnangatna gita tangka paisarangchi dakchakna ku·rachakaniko on·angahachim. Da·o dipet ia scheme-na a·dok gimikni sak lak 3.50-mangni gita me·chikrang biming segattokahachim.
NPP-chi dilenggipa MDA sorkarini chu·sokgijanirangko janapatengon, “Batanggimin bilsi bongani gisepo ia sorkari maiko dakaha? Ia bilsi bongani gisepo uamang maiko dakaha, report card-ko mesokchina chinga ra·bienga. Indita bilsirangni ja·manoba maini gimin Meghalaya a·doko chu·onga gita bijolirangko man·kujaenga? Maini gimin chadamberang janggi tangani cholrangko man·jaenga?” ine Banerjee sing·doangaha.
Ia tom·bimonganio AITC-ni national general secretary Abhishek Banerjee-ba jinmana aganprakangengon, Meghalaya TMC-ni niksamsoe kam ka·anio ka·donganiko on·engani gimin a·dokni manderangko mittelpilangaha.
“Manderangni chingna ka·saani, mittelpilani aro ka·oksianiko nike, anga iako aganna man·gen, Garo Hills-o NPP seat ge·sakoba chena man·jawaha,” ine Banerjee parakataha.
Ia tom·bimonganian tangka jakkalsretgipa NPP-MDA sorkarini siangna sianiko mesokani ong·enga ineba ua parakataha.
Meghalaya a·doko AITC sorkariko rikna man·genchimode, a·doktangni manderangan sorkariko chalaigen ineba AITC-ni national general secretary parakataha.
“Na·simangni da·o sal 50-ko chingna on·genchimode, TMC-na kam ka·enggiparang aro seokako man·gipa TMC-ni dilgiparang, a·dokni mikkim rasongko ra·bapilna gita uamangni bilsi bonga somoiko on·skagen ine da·alo anga AITC-ni national general secretary ong·e na·simangni mikkango bamenga aro na·simangna ku·rachakaniko on·enga,” ine Banerjee parakataha.