SHILLONG: Meghalaya a·dokni opposition Trinamool Congress (TMC) dolni dilgipa Mukul Sangma-ko ‘ka·pong’ ine Sombar salo, NCP-oni ong·kate Congress dolo napanggipa Gambegre constituency-ni gitcham MLA Saleng A Sangma matnangataha.
Iani bidingo sing·anina aganchakaniko on·angengon, ua skangonin Congress dolo kakket ong·e dongengachim indiba uko Congress dolni gitcham dilgiparangsa ra·gale galaha ine Saleng parakataha.
“Je mandean angko Congress doloniko ra·galachim da·o Congress dolo ong·jaha. Ua saksa ka·pongsa ong·e Congress doloni ong·kataha aro TMC-o napangskaaha. Da·alo anga Congress dolona re·bapilskaaha,” ine Sangma parakataha.
Apsan daken Meghalaya Pradesh Congress Committee (MPCC)-ni president Vincent Pala-ba Saleng-ko skangonin Congress dolni membor ong·achim indiba ua somoio Congress dolni dilgiparang una kene una tikitko on·jaha ine parakataha.
2013 bilsini Assembly election-onin Saleng Sangma-na Congress dolni tikitko on·jahani gimin ua Independent candidate ong·e susaenba election-rango chegipa ong·skaahachim ine nikna man·a.