TURA: Meghalaya a·dokni manderang dingtanganiko nikna ka·oksiengani giminsa Trinamool Congress (TMC) dolara a·dokna gital dol ong·genchimoba inditan mingsing-minggamako man·engaha ine Sombar salo, Opposition TMC-ni dilgipa aro a·dokni gitcham chief minister Dr Mukul Sangma parakataha.
Ia chang Assembly election-oba ua damgni constituency-rangoni, chong·motan Songsak aro Tikrikilla constituency-oni susaengachim ine nikna man·a.
Sombar salo, ua Songsak constituency-na Williamnagar-o an·tangni nomination-ko file ka·ani ja·man kobor ra·timgipa manderang baksa agangrikengmiting somoio ia kattarangko aganaha.
NPP-chi dilanggipa MDA sorkariko tangka paisa jakkalsreta aro bang·a kamrangkon ka·sretaha ine matnangatengon, MDA sorkarini somoio dingtang dingtang neng·nikanirangko chagrongna nangtokahani gimin manderang dingtanganiko nikna ka·oksitokenga aro ia changode a·dokni manderang TMC-osa ka·dongbattokenga ine Sangma parakataha.
“Meghalaya a·doko TMC-ko bikotani da·o bilsisamangsan ong·aiengkua indiba indita bakkandikbegipa somoion a·dok gimikon manderangni ching baksa bakrimaniko na·simang nikna man·enga. Ia pilakan manderangni dingtanganiko nikna ka·oksiengani giminsa ong·a. Ia a·dokde sakantinin ong·a aro pilakan a·doktangna ka·saa. Chinga TMC-ni gita a·dokko gital dake rikpiltaina sikenga,” ine Songsak constituency-ni TMC candidate parakataha.
A·doko songdongenggipa manderangni nangani kri kamrangko chu·sokatani aro a·dokni tangka paisa ge·antini namgnirangko manderangona sokatania TMC-ni daitoan ong·gen ineba Sangma ku·rachakaniko on·angaha.
“Maini gimin manderang dingtanganiko nikna ka·oksienga? An·chingni a·doko pilakni gita kamrangko ka·sretani, tangka paisarangko jakkalsretani, manderangni man·gnirangko on·gijani, janggi tangani cholrang donggija aro manderangni janggi tangani cholrangko ra·seke ra·anirangan manderangni gisikko dingtangataha,” ine Sangma aganaha.
Meghalaya a·doko TMC dal·rorobaengaha ine janapatengon, TMC-ni membor sakantian a·doko songdongenggipa manderangni nanganirangko ma·sigiparang ong·a aro iani giminan a·dokni manderang TMC-o nokdang ge·sani manderang gita dongtonika ine TMC-ni dilgipa parakataha.