TURA: Changgittamna Salmanpara constituency-ni MLA ong·anggipa aro a·dokni gitcham minister Nimarson Momin, Sombar walo a·gilsakko watangaha.
Bilsi 69 ong·e janggi tanganggipa Momin, ru·utbea sal somoirangnan be·enni gita saanirangko man·engachim indiba ua nampilna gita man·jae, Sombar walo a·gilsakko watangaha.
Ua skanggipa changna 1983 bilsio Salmanpara constituency-o susachengahachim indiba ua somoio chu·sokgipa ong·na man·jae 1988 bilsio apsan constituency-onin susataie seokako man·skaahachim.
1983 bilsini Assembly election-o Momin, Meckenson K Sangma-ni jako amako man·ahachim indiba 1988 bilsio ua HPU dolni Mettalson Sangma-ko chee seokako man·skaahachim.
Uni ja·man Nimarson Momin, 1998 bilsioba Gopinath Sangma-ko chee seokako man·taiaha aro uandaken bon·kamao ua 2008 bilsini Assembly election-oba United Democratic Party (UDP)-oni susae seokako man·taiaha.
2008 bilsio seokako man·ani ja·man ua food & civil supplies aro dingtang dingtang department-ni minister-ba ong·angahachim.
Uni tanggitik sianganina dingtang dingtang dilgiparang kalimpaanirangko parakattokaha.
