WILLIAMNAGAR: Re·baenggipa February 27 tariko Meghalaya Legislative Assembly-ni general election-ko ong·atengani gimin Mongolbar salo, Meghalaya a·dokni Chief Minister DP Wahlang, Williamnagar-ona re·baenba, ia election-na East aro North Garo Hills a·jarango tarisamsoanirangko nipilangaha.
Ia tom·aniko Williamnagar Circuit House-o ong·atangaha aro tom·anio East Garo Hills a·jani Deputy Commissioner Jagdish Chelani aro North Garo Hills a·jani Deputy Commissioner RP Marak baksana a·ja damgnini Superintendent of Police (SP)-rangba bakko ra·angaha.
Ia tom·anio a·dokni Chief Secretary, a·ja damgnini official-rang baksa chanchirimangengon, ia election-ko name matchotatna gita Election Commission of India (ECI)-ni dongimin niamrango pangchake ong·atchina a·ja damgnini official-rangkon didiangaha.
Ia Assembly election-na a·dokni pilak a·jarangon name tarisamsotokengaha ineba Wahlang parakataha.
Election-ni somoio dakna nanggni aro dakna nanggijanirangko talate on·angengon, pu·onani salode darangkoba mobile phone-rangko polling station-rango ra·napna on·jachina gita Chief Secretary, a·ja damgnini official-rangko didiangaha.
East Garo Hills a·jao ia election-na tarisamsoanirangko Deputy Commissioner Jagdish Chelani, chief secretary-na talate on·angengon, East Garo Hills a·jao damgittam Assembly constituency-rang, chong·motan Rongjeng, Songsak aro Williamnagar constituency-rang donga aro a·jao gimik dam 180 polling station-rang donga ine parakataha. Election-na East Garo Hills a·jao chu·onga gitan polling official-rangko ra·manaha aro uamangna da·o dipet changgni training-ko on·manaha ineba Chelani parakataha.
Ia tom·anio East Garo Hills a·jani SP Abraham Sangma-ba aganprakengon, election-ni somoio tom·tomaniko rakkiangna gita bakan ma·mongoni dol 6 CAPF sokbagen aro unbaksa a·dokni police-rangba kamrangko ka·anggen ine parakataha.
Ia election-na North Garo Hills a·jao tarisamsoanirangko Deputy Commissioner RP Marak, talate on·angskaengon, North Garo Hills a·jao gimik dambri Assembly constituency-rang donge gimik dam 175 polling station-rang donga ine parakataha. Election-ni niamrangko pe·na man·jana gita a·jao flying squad, static teams aro gipin dolrang bilaken kamrangko ka·enga ineba Marak parakataha.