-
SHILLONG: Meghalaya Assembly election-na campaign ka·aniko a·bachengatani bak gita Bristibar salo, Congress dol, Meghalaya a·dokko ‘Five Star’ a·dok ong·atna ‘Mingbonga On·kanganirangko’ parakataha.
Ia on·kanganirangko Meghalaya Pradesh Congress Committee (MPCC)-ni president Vincent Pala, AICC-ni general secretary Meghalaya in-charge Manish Chatrath baksa, Shillong songjinmani Congress office-o kobor ra·timgiparangni mikkango parakataha.
“Chingni mingbonga on·kanganirangoni mongsonggipa aro skanggipa kamara detangtangtangko aldumittangenggipa randi ma·giparangna japrako gong 3000/- tangkako direct transfer ka·e on·anian ong·gen aro ian uamangni nokdangrangko chalaianio uamangna tangka paisani gita dakchakanirangko on·gen. Japrako gong 3000/- ka·e on·genchimode uan bilsio gong 36,000/- ong·enga aro ian ma·giparangna dedrangni skul fee-rangko on·na aro nokdangko chalaina dakchakani ong·gen,” ine Press Conference-ko ong·atani Vincent Pala aganaha.
“Chingni gnigipa on·kanganiara Meghalaya a·doko nokdang ge·antini kam man·na kragipa mande sakprakna kam mingprakko on·anian ong·enga. A·doko kamrangko ka·e cha·na cholrangko man·jaengani a·selan a·dokni chadamberang gisikni gita dongtogijanirangko man·enga aro chadamberang bang·batan kamrangko sandina New Delhi, Mumbai, Kolkata aro uandake chel·begipa biaprangona re·angna nangtokenga,” ineba Pala aganaha.
Ia press conference-o AICC-ni general secretary Meghalaya in-charge Manish Chatrath-ba aganprakengon, NPP-BJP-chi dilenggipa sorkariko matnangatenba, ia sorkari chadamberangko nama ramao re·dilna gita maming kamrangkon ka·jaha ine parakataha.
“Meghalaya a·doko NPP aro BJP-chi dilgipa sorkarini skanggipa chu·sokgijaniara niam retirangko rakkina man·gijanian ong·a. Chadamberangni gisepo kamrangko ka·e cha·na cholrangko man·jani a·selan chadamberang ong·gija dakgipa kamrangko aro pekgipa samrangko ra·na draatako man·tokaha,” ine Chatrath aganaha.
Meghalaya a·dokko tangka paisa jakkalsretani grigipa a·dok ong·atna gita Congress on·kangenga ineba ua parakataha.
