SHILLONG: Police check gate-oni katna jotton ka·a ine matnanganiko Gambegre constituency-ni Congress candidate Saleng Sangma jegalataha.
Adita salrangna skang, West Garo Hills a·jao election official-rangni police-rang baksa rama gita re·ruraenggipa garirangko nirikkiengmiting somoio, Gambegre constituency-ni Congress candidate Saleng Sangma-ko salangenggipa gari bolsa, ua biaponi sale katna jotton ka·aha ine badiaba badiaba songbadrango parakatahachim. Ja·mano police-rang, uni gariko rikangenba Gambegre sambao srapeaha indiba uni garioniko mamingkoba man·jaha ineba songbadrango seahachim.
Indake ong·genchimoba, an·tangni kosako iandake matnanganiko Saleng jegalatskaenba, election changantian badiaba badiaba dolrang, uni kosako iandakgipa kamrangko ka·na jotton ka·ronga ine parakatskaaha.
Saleng-ni parakatani gitade, baditaba bilsirangna skang uni nokko boma godape chadrapahachim aro 2018 bilsini election-oba uni candidate saksako aro police saksako so·ote galahachim.
Ua Election Commission of India (ECI)-ni dongimin niamrangko mande ra·a aro maming saloba niamrangko pe·gipa ong·ja ineba Sangma parakataha.
Police aro election official-rang, uni gariko rikbebeaha ong·ode ia obostani video-ko mesokchina gitaba ua dabiangaha.
Adita salrangna skangsan ua Nationalist Congress Party (NCP)-oni Indian National Congress (INC)-ona apjitangskaahachim.
Indake ong·engon, election changantian Saleng Sangma-ni kosako gipin dolrang, chadrapanirangko aro ong·gija kamrangko ka·na jotton ka·rongenga ine Congress dol parakatenba, uni naljokanina una chel·chakgipa sipai dolko on·piltaichina dabiangskaaha.
Election-ni niamrangko pe·aha ine matnangenba, Saleng Sangma-na on·gipa personal security officer (PSO)-rangko election commission ra·galatahachim ine nikna man·a.
“Chingni candidate Saleng Sangma-ni janggina kenchakanirang ong·engani gimin chel·chakgipa sipai dolko on·pilchina chinga state aro central election commission-ko didienga,” ine Sukrobar salo, Congress dolni dilgiparang parakataha.
