Mawkyrwat: Re·baenggipa February 27 general election-rangna skang a·dokni dingtang dingtang political party-rangni candidate-rang uamangni campaign ka·anirangko dingchikbatatengon, dolsa dolgipinni kosako matnange aro kam kattarango cho·bile agananirangba batoroenga.
A·songni dingtang dingtang a·dokrango Kristianrangko chadrapgenchimoba Bharatiya Janata Party (BJP) mamingkoba aganchakja ine matnangan baksa apsan somoion a·doko sason ka·enggipa MDA sorkariko re·dilenggipa National People’s Party (NPP)-ba BJP-ni agent-sa ine Trinamool Congress matnange aganaha.
Ia kattarangko TMC dilgipa aro Rajya Sabha MP, Dereck O’Brien mnisalo TMC Mawkyrwat Block-ni gita Nativity Stadium, Mawkyrwat-o ong·atgipa Youth Empowerment Rally-o aganaha, jeon ritcha ritcha manderang, mongsongbate chadamberang bakko ra·angaha.
“Skanggipade an·ching Indian ong·a, uni ja·mansa dingtang dingtang jat aro a·jolrangoni ong·a, aro uan Indiani nitoani ong·a aro ia nitoaniko an·ching ripingna nanga. India-o mai ong·enga? Assam, Chhattisgarh, Karnataka, Uttar Pradesh dakgipa a·dokrango maina Giljarangko chadrapenga aro Meghalayao sason ka·enggipa sorkariara maina BJP-ni puppet dake dongenga?,” O’Brien aganaha.
O’Brien, Congress-ni kosakoba indake matnange aganaha je dal·gipa Congress party skangode bite chambile nanggipa bol gita ong·achim indiba da·o adita bilsirangonin bite grigipa bol gita ong·aijok. Congress party, da·ode tusidimugipa party gitasajok,’’ ua aganaha.
TMC, Meghalayao sorkariko rikgen aro ua sorkariko Meghalayani manderangchi, Meghalayani manderangna aro Meghalayani manderangni sorkariko rikgen, Delhioni ba gipinoni manderangchi ong·jawa ineba ua a·kange aganaha.
