TURA: Robibar salo, West Garo Hills Election Branch-ni SVEEP Cell-ni gita Ethical Voting ba nama bewalo dilgipako seokani bidingo NCC Cadet-rangna agan-talate on·na gita awareness program-ko Tura Don Bosco College-o ong·atangaha.
Ia program-ko ong·atanio West Garo Hills a·jani Additional Deputy Commissioner (ADC) George Marboh, jinmana aganprakengon, re·baenggipa February-ni 27 tariko ong·atenggipa Meghalaya Assembly election-o nama bewalo dilgipako seokchina NCC cadet-rangko didiangaha.
An·tangtangna on·gimin bilko jakkale dilgipako seokanio bak ra·na nangani gimin gipinrangnaba agan-talate on·skachina gitaba ua NCC cadet-rangko didiangaha.
Election-ni somoio, gam-jinrangna mikpakma nie aro jat ba torom basee dilgipako seokjachina indiba a·songko dilna kragipa mandekosa seokchina gitaba ia tom·anio ADC didiangaha.
Ia program-ko ong·atna gita CO 41 Meghalaya NCC Battalion-ni Colonel Jesus Furtado-ni dilanichi uni dolba dakchake on·aha aro ia program-ko ong·atanio Tura Don Bosco College-ni Principal-ba dongpae bak ra·angaha.
Ia program-ko ong·atanio Tura Don Bosco College, Tura Government College, Tikrikilla College aro Durama College-ni NCC cadet-rang bakko ra·angtokaha.
