TURA: Batanggimin bilsi bongana South Tura-ni MLA Conrad K Sangma an·tangan a·dokni chief minister ong·ahaoba, ia constituency-ni bang·a biaprangon chu·onga gita chirangko man·tokjaengani gimin bang·a manderang suk ong·gijaniko paraktokaha.
South Tura constituency-o, mongsongbate Hawakhana-oni Dakopgre jolrangona kingkingan ringani chirangko man·jaengani gimin pring aro attamantian ramarango manderangni chi ko·na riting dake senganirangko nikna man·ronga aro ian ia constituency-o ong·enga obostako mesokaniba ong·enga.
Tura Hawakhana-o songdongenggipa mande saksani parakatani gitade, uamang noktango chiko man·jaengani a·selan dingtang dingtang biaprangonikosa chiko sandie ko·na nangenga aro ia chirangko uamang autorickshaw-rangosa gate noktangtangona ra·angrongenga.
Ia jolrango chirangko man·jaengani gimin mitam manderangde, pick up garirango chirangko sale pale cha·skana cholrangkoba man·enga ine u·iataha.
“Anga angni gario litre 1500 ong·gipa chiko changsano salbae, dingtang dingtang nokdangrangona sokate on·enga aro basakobarangde anga iana bateba chirangko salbae palna man·a,” ine South Tura constituency-o chi salrurae pale cha·enggipa mande saksa parakataha.
Meghalaya a·dokkoba Jal Jeevan Mission (JJM)-ni kamo chu·sokatbatsranggipa ine re·anggipa bilsiosan President-ni jakchi boksisko on·angahachim aro iani giminan a·dokni chief minister Conrad Sangma-ba changni chang, NPP sorkarini kamna rasong dake agananirangkoba nikna man·ahachim.
Indake ong·engon, South Tura constituency-o songdongenggipa manderangde, chirangko chu·onga gita man·jaengani gimin aro sorkarini dingtang dingtang scheme-rangko man·tokjaengani gimin batanggimin somoirango ong·anggipa pilak MLA-rangko aro sorkarikoba matnangatskaaha.
“Indita bilsirangna chinga dingtang dingtang party-rangna aro candidate-rangna pu·onaha indiba chingni janggi tanganio nangchongmotgipa chi aro gipin nanganirangkon chingna chu·onga gita on·na man·chipjaenga. Sorkarini gipin scheme-rang, jekai kangal cholgrirangna nok rike on·ani PMAY scheme aro gipin scheme-rangkoba mitamrangde man·pajaenga,” ine South Tura constituency-ni gittim damsao songdongenggipa mande saksa parakataha.
South Tura-o constituency-o mitam manderang, re·a doanirango neng·nikanirangko chagrongna nangtokenga ineba paraktokaha.
“Danakgre jolo donggipa chingni university-onade auto salgiparangba re·na gong·tokja aro uamang gong·genchimoba anga bang·bea tangka paisarangko gamna nangskaa. Iani a·selan chinga bang·bata chatro chatrirangan ja·achisa re·tokbataia,” ine ICFAI University-o poraienggipa chatro saksa parakataha.
Apsan daken, South Tura constituency-ni Tura Bazar jolo songdongenggipa manderangba an·tangtangni chagrongna nangenggipa dingtang dingtang neng·nikanirangko parakattokaha.
Tura Bazar-o dokkan dakenggipa mande saksani parakatani gitade, Tura Bazar-ni mongsonggipa footpath-rangon me·su aro ma·manti bosturangko palgiparangsa bosturangko palengani a·sel ja·arangchi re·ruraenggipa manderangde neng·nikanirangko chagrongna nangtokengani gimin ramasamrango palbadinge cha·enggiparangko ta·raken dingtang biapona apjitna nangenga.
“Tura bazaar-o footpath-rangna agreba rama gimikon apchangket ong·engani a·sel neng·nikanirangko chagrongna nangronga. Uni gimin ia biapo flyover ba overbridge-ko rikgenchimode ia neng·nikaniko bewalde namatna man·genchim,” ine Beldarpara jolni mande saksa parakataha.
Ia chang Assembly election-o South Tura constituency-oni a·dokni chief minister Conrad K Sangma baksa BJP-ni Bernard N Marak, TMC-ni Richard Marak, UDP-ni John Leslee K Sangma aro Congress-ni Brenzield Ch Marak susaengachim ine nikna man·a.
Ia changoba NPP-ni candidate Conrad Sangma, NPP-na balwa balenga ine chepiltaina ka·dongengon, unbaksa susaenggipa gipin candidate-rangba uni kamrangko matnange, an·tangtangni chena ka·dongenganiko paraktokskaenga.