TURA: Garo Hills-ni Mahendraganj, Rongjeng, Mendipathar aro Kharkutta ia dambri biaprango election-rangna ong·atgipa tom·anirango Assam-ni Chief Minister Himanta Biswa Sarma bang·bea manderangchi mande rimchaksoako man·aha.
Ua tom·anirango ua BJP-na puonchina aro uamangni a·joltangtango party-ni candidate-rangko seokchina ua aganaha. Himanta Biswa Sarma manderangko gisik salna Assam-o aroba Meghalaya-oba ma·mong sorkarini scheme-rangko ta·raken kam ka·enga ine aganaha.
Assam-ko tosusae Meghalaya-o bang·gijasan nokdangrangsan PM Awas Yojana gita mongsonggipa scheme-rangni namgniko man·aia. Cha·bokgipa ong·aoniko ra·galna nanggen a·doko BJP sorkariko seokode da·o ua scheme-rang manderangona sokangchongmotgen, ua aganaha.
Assam-o Arun Uday scheme namen chu·sokengani bidingo Himanta Biswa aganaha. Ia scheme-ni ning·o BPL nokdang ge·antini segipa ra·gijagipa ba me·chikma buchuma me·chikrang saksa jaantian 10 tariko gong 1200 tangkako man·gen, ua aganaha.
Assam-o jaantian ia scheme-oniko lak 35-mang gita me·chikrang namgniko man·engaha. Bil-sasonko jakkepna seokode Meghalaya-oba BJP apsan bil gnanggipa namgnirangko on·dapanggen, ua aganaha.
Assam-o re·anggipa bilsio laksa chadamberangna kam on·gen BJP sorkari ku·rachakaha. Ianoni sak 50,000 chadamberangko kamo rakkiaha aro bangkirangko ia bilsini May jana skangan kamrangko on·gen, Himanta aganaha.
Meghalaya-ni chadamberang sorkario kam man·jae neng·nikaniko man·e dongenga aro BJP-san namroro-silroroaniko ra·bana man·aigen ba a·doko kamrangko nakatna man·aigen, ua agandapaha.
BJP-ko seokode Assam-o gitan M’laya, namroro-silrorogen: Himanta Biswa Sarma
Date:
Share post:
