SHILLONG: Gital sorkariko rikna okamchina gita Sukrobar salo, a·dokni Chief Minister Conrad K Sangma-ni dilanichi gital seokako man·gipa National People’s Party (NPP)-ni sak 26 MLA-rang, a·dokni Governor Phagu Chauhan-ko grongeaha.
NPP-ni sak 26 MLA-rang baksana Bharatiya Janata Party (BJP)-ni MLA sakgni aro Baghmara-ni Independent MLA Kartush R Marak-ba Governor-ko grongeanio dongpaaha.
Raj Bhavan-ona re·ange a·dokni Governor-ko grongena skang, NPP-ni MLA-rang, Chief Minister-ni noko tom·aniko ong·atangenba, Conrad Sangma-ko NPP parliamentary party-ni dilgipa songaha.
Governor-ko grongeani ja·man kobor ra·timgipa manderang baksa agangrikengon, BJP-ni MLA sakgni baksana Baghmara-ni Independent MLA aro gipin dolni MLA-rangba NPP baksa bakrimna kusi ong·engani gimin gital sorkariko rikna a·kangna gita Governor-ko grongeaha ine NPP parliamentary party-ni dilgipa Conrad Sangma parakataha.
Gitcham sorkariko chalaianio NPP baksa United Democratic Party (UDP), Hill State People’s Democratic Party (HSPDP) aro People’s Democratic Front (PDF) dolrangba bakrimaniko on·ahachim indiba ia changode ia dolgittaman bakrimaniko on·ani bidingo parakskakujaengachim.
A·dokni gital Voice of the People’s Party (VPP)-ba NPP-ni dilanichi sorkariko chalaianio bakrimjawa ine Bristibar salon parakatmanahachim.
Indake ong·engon, Bristibar salosa election-ni result-rangko parakahani gimin bang·bata MLA-rangan Sukrobar salosa Shillong-ona re·batokenga aro Sukrobar attamni gisepon chu·gimik MLA-rangni bimingko ua on·gnok ine Sangma parakatskaaha.
Gital sorkariko rikna man·na gita ua Governor-ko grongeani somoion chief minister-ni kamko watna gitaba chittiko on·angjolaha.