SHILLONG: National People’s Party (NPP)-ni bidingo manderangni ong·gija chanchianirangko gimaatna nangenga ine Mongolbar salo, NPP-ni Cabinet Minister Ampareen Lyngdoh, minister ong·e ku·mikchetani ja·man kobor ra·timgiparangna parakataha.
Manderangni nangnikanirangko chu·sokatna aro dingtang dingtang neng·nikanirangko namatna gita ia sorkari, an·tangtangko tarina nangenga ineba Lyngdoh aganaha.
Dingtang dingtang dolrang baksa MDA 2.0 sorkariko rikna man·ahani gimin an·tangni kusi ong·aniko parakatengon, MDA 2.0 sorkariko dingtang dingtang dolrang nangrime rikengoba ua maming ma·sisretanirang donganiko nikjaenga aro batanggimin bilsi bongani gisepoba ia sorkari apsan kamrangko ka·rimaha ine Lyngdoh parakataha.
“Angni chanchiani gitade, manderangni nangnikenggipa dingtang dingtang kamrangko mingprakprak dake chu·sokate on·asa nangenga,” ine NPP MLA aganenba, election-ni ja·man da·o kim·kimaniko ra·bapiltaiaha ine parakataha.
Khasi Hills-o vote-rang pripraaniara namen jajrengna nangani ong·ahachim ine janapatengon, pilak political dolrangan da·o apsan nangrime a·dokni namgnina kamko ka·na re·mikkangaha aro ian a·dokna namgni ong·gen ine Lyngdoh parakataha.
“Dingtang dingtang dolrangni gisepo chanchianirang dingtanggrikanide dongaigen indiba ian a·dokni namroro silroroanio maming nangchakeani dongna gita nangjawa,” ine ua aganaha.
India a·song gride Meghalaya a·dok ong·na man·ja ine janapatengon, ia salni bako ua a·songni Prime Minister baksa apsan stage-o chadengna man·ahani gimin namen kusi ong·aha ine Lyngdoh parakataha.
“An·ching a·song baksa re·mikkangna nanggen aro da·alo a·songni Prime Minister an·tangan manderangni seokaniko ma·sichake ianona re·baahani gimin uni onataniko an·ching pilakan mande ra·na nanga,” ine Lyngdoh aganaha.
Indake ong·engon, dingtang dingtang dolrangni matnangani gita, bilsi bongana MDA-I sorkariko chalaianio maming ong·gija dakanirang dongja aro da·o MDA 2.0 sorkariko chalaianioba maming ong·gija dakanirang dongjawa ine sakgipin cabinet minister aro Rongara-Siju MLA Rakkam A Sangma parakatskaaha.