SHILLONG: National People’s Party (NPP)-ni dilanichi gital Meghalaya Democratic Alliance (MDA-2.0)-ni dilgiparang, Mongolbar salo ku·mikchetahaon, a·doko matchotgija dongenggipa kamrang, jekai Inner Line Permit (ILP)-ko ra·gatchina dabiani, Khasi aro Garo ku·sikko Eighth Schedule-o chapatchina dabiani, Assam baksa meligrikna man·jaenggipa simarangko namatchina dabiani aro uandakgipa dingtang dingtang kamrangko ta·raken matchotatchina ia gital sorkariko, Khasi Students Union (KSU) didianggnok ine u·iataha.
A·dokna nangenggipa kamrangko MDA 2.0 sorkari chu·sokatna ka·dongsoenga ine janapatengon, “A·doko ILP-ko ra·gatchina dabiani, Khasi aro Garo ku·sikrangkoba Indian Constitution-ni Eighth Schedule-o napatchina dabiani, lekka porani kamrangko namdapatchina dabiani, department ge·antion kamna manderangko ra·anio maming dongnuani gri ong·china dabiani, a·doko sanna banani cholrangko namdapatchina dabiani aro uandakgipa dingtang dingtang kamrangni bidingo sorkarina u·iatmanaha,” ine KSU-ni president Lambokstar Marngar parakataha.
A·dokni chadamberangna nambata cholrangko on·na man·na gita dingtangmancha gisik on·e kam ka·china gitaba KSU dabiangaha.
“Gital sorkariko chalaianio chinga jrip nie dongjawa aro a·dokna nangchongmotgipa kamrangni gimin sorkariko didironggen. A·doko songdongenggipa manderangni namgnina chinga gital kamrangni giminba sorkarina u·iatgen,” ine KSU-ni president aganaha.
Assam aro Meghalaya a·dokni simarango ong·enggipa obostarangko namatna ja·ku de·enggipani gimin janapatskaengon, “Sima jolrango songdongenggipa manderangni nangnikanirangko sorkari knachakna nanggen. Ia gital sorkari, manderangni nanganirangko knachakgipa aro manderangni nangani kri chu·sokate on·gipa sorkari ong·china,” ine Marngar parakataha.