AMPATI: Adita salrangna skang, Haryana a·dokni Gadpuri National Youth Complex-o ong·atanggipa National Integration Camp-o South West Garo Hills a·jani Scouts & Guides dol, nambee dakmesokanirangchi a·dokna mikkim rasongko ra·baaha.
A·songni dingtang dingtang bakrango donggipa chadamberang, dingtang dingtang jatni daka rikanirangko skie ra·enba India a·songo meli nangrime donganiko rakkiangna miksonganio ia National Integration Camp-ko ong·atangaha.
Ia Camp-o South West Garo Hills a·jaoni Rover sakbri, Ranger sakbri, Scouts sakbri aro Guide sakgittamko man·chape gimik sak 15 chatro chatrirang re·ange bakko ra·angaha aro uamangko Meghalaya BS&G-ni District Organising Commissioner (S) Pular D Shira, Garobadha St Dominic HS School-ni Scout Master Probath Ch Marak aro SWGH-ni Guide Captain Bonchera R Marak dilangaha.
Ia salbongana ong·atanggipa National Integration Camp-o South West Garo Hills a·jani Scouts & Guides dol, dingtang dingtang program-rangko bak ra·angaha aro Folk Song Competition-o skanggipa boksisko, Patriotic Song competition-o gnigipa boksisko, Festival of India competition-o gittamgipa boksisko aro gimikni gita susaanioba gnigipa biapko man·e Meghalaya a·dok gimikna mikkim rasongko ra·baaha.
South West Garo Hills a·jani Scouts & Guides dolna, uamangni re·a doani aro National Integration Camp-o bak ra·anio Tura-ni MP Agatha K Sangma, Betasing-ni BDO CRN Sangma, MBS&G-ni State Secretary aro District Secretary-ba dakchakanirangko on·ataha.
