SHILLONG: Re·anggipa Bristibar salo, West Garo Hills a·jani Lower Wadagokgre jolo, dot 17 bolsalrangko cha·ue salangenggipa Mahindra pik-up gari bolsako re·rurae nirokenggipa Forest department-ni manderang rim·na man·ahachim indiba ja·mano dolsa manderang, ramao ia gariko champengsoenba sale kataha ine kobor on·aha.
Koborko on·ani gitade, Bristibar attam 4:24 bajimango, dot 17 bolsalrangko cha·ue salangenggipa Mahindra pik up gariko Forest department-ni manderang rim·na man·ahachim indiba ia gariko Phulbari Range Office-ona ra·angengmiting somoio sak 15-na batgipa manderang, Belbari Halgora song sambao champengsoaha aro ia manderang, Forest official-rangko ka·mikkenatenba, ia gariko sale katangaha.
Ia gariko salgipa mandeni bimingara Mondol ong·achim aro official-rangko champengsoe ka·mikkenatgipa manderangoni mitamkode Zakir Hussain, Baharul Islam, Soyad Zamul aro gipinrang ong·achim ine kobor on·timgiparang parakataha.
Ia a·selni bidingo police-rang ning·tue sandirokaniko dakna a·bachengataha ineba kobor on·aha.
