SHILLONG: Election-ni somoirango vote-rangko salna gita tangka paisarangko jakkalani batroroengani gimin Sonibar salo, UDP-ni president aro Mairang-ni MLA Metbah Lyngdoh, suk ong·gijaniko parakatenba, ua an·tangni constituency-ode iandake tangka paisana mikpakma nie seokaniko champengna rake kamko ka·gen ine parakataha.
“Mikkangchi an·chingni constituency-rango tangka paisani bilrangsa sason ka·na man·jana gita rake kamko ka·na nangenga. Tangka paisa jakkalaniko champengna gita anga rakbee kamko ka·angkugen,” ine Manai-o UDP-ni tom·aniko ong·atanio Lyngdoh aganaha.
An·tangni constituency-o tangka paisarangchi salna jotton ka·aniko jegalchina gitaba ua constituency-ni manderangko didiangaha.
Adita salrangna skang ong·atanggipa Assembly election-o UDP-ni result-rangni gimin janapatengon, batanggimin changbrina election-ko ong·atanio uamang dingtang dingtang dakgipa result-rangko nikna man·aha ine UDP-ni president parakataha.
“Mairang-o chinga changbri MLA election-ko chena man·aha aro KHADC-oba changittamde chena man·aha. 2019 bilsini KHADC election-o chinga Mairang-oni amakoba man·aha. Mikkangchi ong·na sienggipa election-rangoba chinga dingtang dingtang dakgipa result-rangko nikangkunaba gnang,” ine Lyngdoh aganaha.
2019 bilsio amako man·ani ja·man ua election-rangko altuae ra·jana gita skiako man·aha ineba UDP MLA parakataha.
Ia 2023 bilsioba ua Mairang constituency-o 155 vote-mangmangchisan chena gita man·aiahachim.
“Angnade cheanide cheanian ong·aia, ua dal·eba ong·china ba bang·gija vote-rangchiba ong·china. An·ching rakbee kamko ka·ahani a·sel cheahani gimin kusi ong·na nanga,” ine UDP-ni president aganaha.
2018 bilsiode ua 10,573 vote-rangkosan man·aiahaoa ia changode 19,066 vote-rangko man·aha ine janapatengon, “Ia chango anga 8500 vote-rangko bate man·ahani gimin namen kusi ong·a,” ine Lyngdoh aganaha.