Shillong: Meghalaya High Court-ni ge·eta gitan, a·dok sorkari, Them Iew Mawlong-oni Harijan Colony-o donggipa nokdang ge 342-ni manderangko jitatna kam ka·anggen ine Deputy Chief Minister, Prestone Tynsong aganataha.
“Harijan Panchayat Committee (HPC)-ko mija bilsi November jao agangrikna okamaha. Indiba uamang sorkarini proposal-ko aganchakna somoiko bi·dapaha. Agangriktaina gita uamangna lekkako seattaiaha. Uamangni aganchakatako nichake dongenga, ine Tynsong, jean High Level Committee (HLC)-ni chairman ong·a, koborna parakataha.
Meghalaya High Court, Sukrobar salo, a·dok sorkariko Harijan Colony-o donggiparangko gipin biapona jitatani kamko matchotatchina gita April jaona somoiko on·ataha.
A·dok sorkari, HPC-na aganchakna gita April 10 tarikona somoiko on·atani ja·man court-ni ge·etani sokbaaha. Harijan Colony-o donggiparangko Shillong Municipal Board (SMB)-ona jitatna sorkari, proposal-ko on·aha.
Chief Justice Sanjib Banerjee aro Justice Wanlura Diengdoh- uamangni Division Bench, Harijan Colony-ni bidingo on·atgipa ge·etanio, dolgnikon April jaon mamlako agangrike matchotatchina ge·etaha.
Sukrobar salo hearing ka·ani somoio a·dok sorkari, court-na HPC-na April 10 tarikona somoiko on·ani gimin u·iataha.
Mikkang ja April 24 tairko ia mamlako hearing ka·angtaigen.
HPC-ni memborrangko grongao, sorkarini proposal-ko aganchakna April 10 tarikona somoiko on·aha ine Urban Affairs Minister, Dhar, koborna u·iataha.
“HPC-ni sorkario jagittamna somoi bi·dapako jegalaha ine Dhar aganaha.
