SHILLONG: Sombar salo, Assembly-ni Budget Session-ko a·bachengatanio Meghalaya a·dokni Governor Phagu Chauhan, English-ko name poraina man·jani giminsa Hindi-chi aganprakaha ine a·dokni Chief Minister Conrad K Sangma talataniko on·angaha.
Governor-ni Hindi-chi aganprakanina jegale VPP MLA-rangni jinma ong·katgrime katanina an·tangni suk ong·gijaniko parakatengon, “Batanggimin changrangoba iandake Governor-ni aganprakanio English ku·sikko jakkalgijaniko nikna man·aha. A·dokni Governor, English ku·sikko aganna aro poraina name man·jani giminsa da·alo Hindi-chi aganprakskaahachim,” ine Sangma parakataha.
India a·songara dingtang dingtang jat aro toromrangni meli nangrime songdong a·chagipa a·songsa ong·ani gimin iandakgipa obostarangara ong·rongbewalsa ong·aiachim ineba ua aganaha.
Mitam Governor-rangara Hindi ku·sikko jakkalbatgipa a·dokrangonisa ong·ani gimin iako ma·sichakna gita nangchongmota ineba Chief Minister aganaha.
“Gitcham Governor-rangba an·tangtangni jakkaltogipa ku·sikrangchi aganprakna mol·molanirangko nikna man·ahachim. Iani giminsa da·alo a·dokni Governor-ba English ku·sikko name man·jani gimin Hindi-chi aganprakna on·china mol·molaha. Governor-ni aganprakgipako English-chi seenba Assembly-ni membor-rangna on·skaahachim,” ine Sangma aganaha.
Governor-ni Hindi-chi aganprakaniko jegaltokahani giminba ua an·tangni suk ong·gijaniko parakataha.
“Assembly-o iandakgipa kamrangko ka·engon aro mongsongbate Governor-ni aganprakanirango membor-rang, mande ra·aniko mesokna nanga,” ine Chief Minister aganaha.
Assembly-o Governor, gipin ku·sikchi aganprakenganiara Assembly-ko ba jatni daka rikanirangko mande ra·gijani ong·enga ine agananiara namen kragijani ong·a ineba Sangma aganaha.
A·dokni Guv English-ko aganna man·jani giminsa Hindi-chi aganpraka ine CM talata
Date:
Share post: