SHILLONG: Meghalaya a·dokna Capital Investment Fund (CIF)-oniko gong kror 300 tangkarangko ma·mong sorkari chamdapataha ine Sombar salo, a·dokni Chief Minister Conrad K Sangma parakataha.
“CIF-ni ning·o chamatgipa tangkarangko chu·gimik jakkalgipa a·dokrangoni Meghalaya a·dokba damsa ong·paahani gimin ian a·dokna man·dapanisa ong·enga,” ine Sangma, kobor ra·timgiparangna aganaha.
A·bachengon CIF-oniko Meghalaya a·dok, gong kror 600-mangko man·soahachim ine janapatengon, 2022-2023 bilsina chamatgipa tangkarangko mitam a·dokrangsan chu·gimik jakkalaiaha aro ia a·dokrangoni Meghalaya a·dokba damsa ong·paaha ine Sangma parakataha.
Union Finance Minister Nirmala Sitharam-ko grongeani somoio a·dokni tangka paisarangni gimin maikoba janapatahama ine sing·on, dingtang dingtang project aro scheme-rangna chamatgipa tangka paisarangko Meghalaya a·dok, pilak tangka paisarangkon name jakkalaha ine Chief Minister parakataha.
Meghalaya a·doko niam gri koela bikotani aro salruraaniko CISF-chi nirikkichina High Court, hukumko on·ahani gimin ia hukumko ra·pilchina sorkari mol·molgenma sing·anina aganchakaniko on·angskaengon, iani bidingo sorkari niengkua aro salsa salgnini gisepon nanga gita ja·kurangko de·anggen ine Sangma parakataha.
Mukroh songko Assam ning·o ga·aka ine Assam Chief Minister Himanta Biswa Sarma-ni a·kanggipani gimin janapatskaengon, Mukroh songde a·dok damgnini meligrikjaenggipa biaprango ga·akgipa song ong·ja aro ia songde Meghalaya a·dok ning·o ga·akgipa songan ong·a ine Sangma parakataha.