U·IATTIMGIPAONI
SHILLONG: Umroi Airport-ko ka·sinsin gipin songjinmarang baksa nangdimatenga indake Airport official-rangba sorkarini Umroi airport-ko namdapatna kam ka·aniko nike kusi ong·tokenga.
A·doko gital airport-ko rikani palo da·o donggipa Shillong-ni Umroi Airport-ko namdapatna sorkari kam ka·enga ine Chief Minister Conrad K Sangma aganaha.
Sorkarini ja·ku de·aniko Airport, namnikaniko parakataha. Da·o donggipa infrastructure-ko namdapatna kam ka·anina namgipa ja·ku de·ani ong·a, ine aganaha.
“Gital airport-ko rikna bilsi 7-8 nanggen, aro iana bang·bea koros ong·gen. Indiba da·o donggipa airport-ni infrastructure-ko namdapatna tangka korosba bang·e bon·jawa aro bilsigni somoirangon matchotaigen.”
Shillong-o G20 meeting-ko ong·atna tik ka·soani gimin Airport-ni obostako ra·dona kam ka·enga. AAI aro sorkari dolgnian Shillong-o ong·atna dongipa meeting-na tarisoenga. Maina Guwahati Airport-oni Shillong Airport-ona sokbagipa delegate-rangko name dake rimchaksona tarisoenga.
Indiba Airport-o bang·bea neng·nikarang ba ra·bianirang dongkuenga. A·doko flight cancellation ba sildoreng bilako dondipataniko chagrongna nangani gimin songregiparang neng·nikako man·ronga.
Mni Sukrobar salo Delhi-Shillong-Delhi bilgipa Spicejet flight-ko techinical -ni gita neng·nikani dongani a·sel company, dondipataha. Jeni a·sel songregiparang neng·nikako man·tokaha.
Minggipin Airport-oni Shillong songjinmaona service-ko on·nanioba bilongen neng·nikkuenga, maina airport-oni taxi-ko man·a neng·a aro je taxi-ko man·a, uarangba dam bate ra·a.
Shillong-oni Airport-ona songregiparangko salruragipa garirang gong 2000-3000 tangkako ra·a. Niatgenchimode Shillong-oni gipin biaprangona songrenaan gong 1500-kosan nangaia.
Iani bidingo AAI, a·dok sorkarina lekka seaha, indiba sorkari, ia mamlako namatna man·kujaenga.