SHILLONG: Kam dontongata man·gipa Meghalaya police officer GK Iangrai-ni pilak case-rangnan Bristibar salo kachari, jaminko on·aha.
Iani bidingo kobor ra·timgiparangna u·iatengon, GK Iangrai-ko bakan jakgitel watgnok ine uni ukil Phiyo Yobin parakataha.
Shillong-o Nationwide Emergency Response System (NERS) building-ko rikna gita chame on·gipa tangka paisarangko jakkalsreta ine matnange, re·anggipa October 28 tariko saksa Darwin Sangma minggipa mandeni CID-na FIR ka·ani ja·man Iangrai-ko November 2 tariko rim·ahachim.
Indake ong·genchimoba an·tangni kosako matnanganirangko ua jegalatskaenba, police department-o ong·gija dakgipa manderang bang·en donga aro gipinrangni ong·gija kamrangna ukosa matnange rim·aha ine gitcham AIG parakatskaaha.
Iani bidingo ua bang·en RTI-rangkoba ka·aha aro ia RTI-rangan police department-o ong·gija dakanirangko parakgen ineba Iangrai parakataha.
2021 bilsini August jao HNLC bobil dolni gitcham general secretary Cheristerfield Thangkhiew-ko so·otanio jak donggipa apsan police officer-rangan uko rim·na chalakki dakanioba jak donga aro iani a·selan una aro uni nokdangnaba kenchakna nangani ong·enga ineba Iangrai, adita salrangna skangsan parakatahachim.
