SHILLONG: Sukrobar salo, Meghalaya Police-ni gita Home Affairs Ministry baksa nangrimenba, Anti-Human Trafficking-ni bidingo salsani state level conference-ko Shillong songjinmani State Convention Centre-o ong·atangaha aro ia conference-ko ong·atanio a·dokni Director General of Police (DGP) LR Bishnoi, Meghalaya State Commission for Protection of Child Rights (SCPCR)-ni Chairperson Iamonlang Syiem, Meghalaya State Judicial Academy-ni Director KML Nongbri aro gipin official-rangba bakko ra·angtokaha.
Ia conference-ko ong·atanio a·dokni DGP, jinmana aganprakengon, human trafficking ba mande palbadinganiko champengna kam ka·aniara namen rakbegipa kam ong·a aro dos dakgipa manderangna sastiko on·aniba chu·ongjaenga ine parakataha.
Bishnoi-ni parakatani gitade, batanggimin bilsidokni gisepo ming 19 case-rangko segatahachim indiba ia ming 19 case-oni minggittam ba mingbri case-rangosan dos dakgipa manderangna sastirangko on·na man·aha.
Mande palbadingani a·selrangni gimin janapangengon, kangal cha·a siani, kamgri ong·ani, biaprang ja·manchakani aro jolo maming namroro silroroanirang dongjani a·selba manderangko bading cha·ronga aro basakobarangde nokdang be·gruani ba segri ong·anichiba iandakgipa obostarangko chagrongna nangao ga·akronga ine DGP parakataha.
Badiaba badiaba biaprangode kamrangko on·na ku·rachakenba a·song damsaoniko damgipinona palbadinge cha·ronga ine janapatengon, iandakgipa kamrangko chel·chakna gita manderangna mikrakatanirangko on·na nangchongmotenga ine Bishnoi parakataha.
