TURA: Garo Hills-o mongma aro mandeni gisepo a·sel ong·anirangko nikna man·rongengon, re·anggipa March-ni 27 tariko, West Garo Hills a·jani Dalu jolo, mongma matte mangsa, adita sak me·chikrangko chadrapna gita rikaha aro mongmani rikanio bilsi 46 ong·gipa me·chik saksa, saknaanirangko man·enba siangna gita nangaha.
Koborko on·ani gitade, ia a·sel ong·ani Kherapara samba jolo donggipa Nabangdagre songo ong·aha aro ua somoio bilsi 44 ong·gipa Etmila Marak, bilsi 46 ong·gipa Chetmila Marak aro uamangni sakgipin ripeng Merita Sangma, a·ba so·na gita buringona re·angahachim. Buringo a·ba so·engmiting somoio rang·san mongma matte mangsa uamangko chadrapna gita rikbaon, uamangoni saksa Merita Sangma-de gipin biapchipak kate jokna man·aha indiba gipin sakgni me·chikkode mongma rikangkuaha.
Mongmana katengmiting somoio uamang sakgnian bilongbee saknaanirangko man·aha indiba mongmaonide joke katna man·ahachim.
Me·chik sakgnian bilongbee saknaanirangko man·ahani gimin bakan uamangko Tura-ona ra·angchina gita doctor-rang ku·pattiataha indiba hospital sokna skangan uamangoni saksade siangaha.
Saknaa man·gipa me·chik sakgnioni saksa Etmila-ba bilonge saknaanirangko man·ahani gimin da·o Tura Civil Hospital-o sanna bananirangko on·engkua ine kobor on·aha.
Ia a·selni bidingo koborko man·soa bakan Wildlife department-ni gita ia songona chel·chakgiparangko watataha indiba uamangni sokangon, ua mongma matte ua biaponi re·angsoaha ine kobor on·aha.
Kobor on·timgiparangni u·iatani gitade, ia a·sel ong·gipa biapara namen buringrara dakgipa biapsa ong·achim indiba songni manderang, ia biapko a·ba cha·na gita adita salrangna skangsan o·e galtokahachim.
Garo Hills-ni bang·a biaprangon iandake buring bolgrimrangko a·ba so·e cha·engani a·selan mongmarang dongchakna biap dongjae, manderangni dongchakgipa biaprangona re·baenga aro iandakgipa a·sel ong·anirangko nikna man·rongenga ineba kobor on·timgiparang parakataha.