SHILLONG: Sohiong Assembly constituency-ni election-ko re·baenggipa May jani 10 tariko ong·atna siengon, MDA 2.0 sorkario bak ong·enggipa National People’s Party (NPP) aro United Democratic Party (UDP) dolgnian ia election-o chegipa ong·na ka·dongenganiko paraktokaha.
UDP-ni candidate aro a·dokni gitcham home minister HDR Lyngdoh, February-ni 27 tariko ong·atanggipa Assembly election-na skang siangahani gimin Sohiong Assembly constituency-ni election-ko May jani 10 tariko ong·atskana siengachim.
February-ni 27 tariko ong·atanggipa Assembly election-o NPP dam 26 seat-rangko aro UDP dam 11 seat-rangko cheahachim aro da·o ia Sohiong constituency-koba dolgnian chena gita krengtokengachim.
Sohiong Assembly election-na UDP-ni tarisamsoenggipani bidingo janapatengon, “Gipin constituency-rango chinga NPP-na kenna gita nangachim indiba Sohiong constituency-ode chinga nambate dakgen aro ia election-ko chinga chena ka·dongenga,” ine UDP-ni general secretary Jemino Mawthoh parakataha.
Sohiong Assembly election-o UDP, HDR Lyngdoh-ni grigipa Synshar Lyngdoh Thabah-ko susaatengachim ine nikna man·a. Ia election-o ua NPP-ni candidate aro HSPDP-ni gitcham MLA Samlin Malngiang baksa susagrikenga.
February-ni 27 tariko ong·atanggipa Assembly election-o UDP, Khasi aro Jaintia Hills jolrangoniko dam 11 seat-rangko cheaha aro NPP-de dam 8 seat-rangkosan cheaiahachim ineba Mawthoh parakataha.
“Vote man·aniko nisusagenchimode dolgnini gisepo inditana dingtanggrikani dongja aro iani giminsa Sohiong-o UDP nambate dakna ka·dongenga,” ine ua aganaha.
Sohiong-o gitcham MLA HDR Lyngdoh-ko manderang namniktokani gimin UDP-na cholrang nambatenga ineba Mawthoh aganaha.
“Ua (HDR) ru·utbea bilsirangna Sohiong-ni MLA ong·angaha aro constituency-ni manderang una ka·satokachim. Ua bilsi 30-mangna Congress-o ong·ani ja·man UDP-o napskana tik ka·aha aro chinga uko chegipa ong·telgen ine ka·dongengachim indiba rasong grie ua a·gilsakko watangna nangaha,” ine UDP-ni general secretary parakataha.
Indake ong·engon, NPP-ni state president WR Kharlukhi-ba, Sohiong constituency-ara gipin constituency-rang gitan NPP-na namen gamchatgipa seat ong·enga aro ia election-o uamang chegipa ong·na susagen ine parakataha.
“Chinga chenasa susaenga, chena ka·dongenga aro chena kam ka·enga,” ine Kharlukhi aganaha.