TURA: Adita salrangna skang, West Garo Hills aro Bangladesh a·songni Sherpur a·ja ning·o donggipa Mymensing division-ni official-rang tom·e chanchirimangenba, Dalu jolo a·song damgnini border haat damsako kulina gita manchie donangaha.
India a·songchipakni official-rangko West Garo Hills a·jani Deputy Commissioner Jagdish Chelani dilangaha aro Bangladesh a·songni official-rangko Sherpur a·jani Deputy Commissioner Sahela Akter dilbaskaaha aro ia tom·anio Border Security Force (BSF) aro Border Guards Bangladesh (BGB)-ni official-rangba dongpae bak ra·angaha.
Ia tom·aniko ong·atani bidingo West Garo Hills a·jani Deputy Commissioner Jagdish Chelani, jinmana parakatengon, “A·song damgnini official-rang, simako chel·chakenggipa sipai dolrang baksa apsan tom·e, border haat-ko kuliani bidingo aro a·song damgnini gisepo chagrongna nangenggipa neng·nikanirangko chanchirimangaha. Ia tom·anio a·song damgnian nangrime border haat-ko kulina manchiangaha aro ia tom·ani chu·sokgipa ong·aha,” ine parakataha.
Ia border haat-na songni nokma an·tangan a·arangkoba on·gilenga ine janapatengon iana ua dingtangmancha songni Nokmakoba mittelpilataha.
“Ia border haat-ko kulianichi West Garo Hills a·jana man·dapaniko ra·bagen aro niam gri bading chiwalanirangko komiatna dakchakgen,” ine Chelani parakataha.
