SHILLONG: Meghalaya a·doko Pradhan Mantri Awas Yojana (PMAY)-ni kamrangko da·o dipet 25 percent matchotatna man·aha.
CM-ni Dash Board-o parakani gitade, Meghalaya a·doko te 65,742 nokrangko ia PMAY scheme-ni ning·o rikna nisanko donahachim aro ianoni da·o dipet te 16,925 nokrangkosan rikna man·engkua aro te 48,817 nokrang bangki dongkuenga.
Koborko on·ani gitade, East Khasi Hills a·jao te 1907 nokrangko rikmanahani gimin PMAY scheme-ni kamrang 38 percent-ni gita matchotaha aro te 3111 nokrang da·o bangki dongkuenga.
Ia Pradhan Mantri Awas Yojana (Urban) Mission-ara 2022 bilsini gisepo pilak urban area-rango nokrangko rike on·na gita 2015 bilsini June 25 tariko a·bachengatgipa scheme ong·achim ine nikna man·a.
Ia scheme-ni ning·o ma·mong sorkari, scheme-ko man·na nangenggipa nokdangrangna nokrangko rike on·na gita nodal agency-rangna tangka paisarangko dakchake on·engachim.