SHILLONG: Meghalaya a·doko songdongenggipa Tribal aro Tribal ong·gijagipa jatrangko man·chape songsalko bak ka·na jotton ka·enga ine Bristibar salo, Meghalaya Pradesh Congress Committee (MPCC)-ni president Vincent Pala, BJP-ko man·chape MDA sorkariko matnangataha.
Iani bidingo kobor ra·timgipa manderang baksa agangrikengon, MDA sorkarini miksonganian, Khasi aro Khasi ong·gijagipa jatrangni gisepo, toromrangni gisepo aro Reservation policy-ni kamoba songsalko bak ka·na miksongani donga ine MPCC-ni president parakataha.
Meghalaya a·doko BJP aro BJP baksa bakrimgipa dolrangni miksonganirangko ma·sie ra·china didiatengon, election-ni somoiode BJP, a·doko tangka paisa jakkalsretanirangko aro ong·gija dakgipa kamrangko sandirokatna ku·rachakahachim indiba election-ni ja·mande uamang an·tangtangan sorkarini kamrangko dongnuna gita MDA baksa apsan nangrime kamko ka·skaengaha ine Pala parakataha.
BJP aro BJP baksa bakrimenggipa dolrang, Meghalaya a·doko songdongenggipa manderangni namgnina kamrangko ka·ani pal, an·tangtangni manderangna aro man·e cha·giparangnasa kam ka·skaenga ine matnangatengon, “BJP-ni dilgiparang, da·al maikoba agangen aro knalde maikobasa dakskagen,” ine Pala parakataha.
Songsalko bak ka·na BJP jotton ka·enga ine matnangatengon, Congress dolde songsalko ku·mong nangrimatnasa jotton ka·skaenga ine MPCC-ni president parakataha.
Indake ong·engon, re·baenggipa May jani 10 tariko ong·atenggipa Sohiong Assembly election-na chanchisamsona gita Bristibar salo Congress dolni dilgiparang, apsan tom·e chanchirimangaha.
Sohiong constituency-o Congress dolni dam 100 unit-rang dongani gimin, ia unit-rangko bilakbatatna gita dingtangmancha dilgiparangkoba seokangjolaha.